Kreu i grupit parlamentar të LSI, Petrit Vasili akuzon policinë se ka dekonspiruar operacionet e Prokurorisë për arrestimin e personave të implikuar në trafikun e drogës.
I ftuar në studion e Report Tv, Vasili iu referua aksionit të një ditë më parë për arrestimin e tre ish-zyrtarëve të lartë të policisë së Vlorës, i cili sipas tij është dekonspiruar nga brenda radhëve të Policisë së Shtetit.
“Shumë aksione të mëdha janë udhëhequr nga Prokuroria dhe janë dekonspiruar nga policia. Si në rastin e djeshëm. E gjithë policia, kupola, ka qenë thellësisht e inkriminuar, pjesë mbështetëse e inkrimunuar thellë në trafikun e drogës. E gjithë kjo kupolë ka qenë e inkriminuar dhe në krye të kupolës, drejtori i përgjithshëm qenka i vetmi i pastër dhe drejton me shumë kompetencë një strukturë të inkriminuar. Një i inkriminuar i madh është ish-ministri i Brendshëm. Këto janë fakte alarmante. Është prova që ata të cilët kanë drejtuar në polici, po shpërndahen deri në Australinë e largët që të jenë gojëmbyllur, që të mosflasin dhe të mos nxjerrin të vërteta të frikshme“, u shpreh Vasili.
Kreu i grupit parlamentar të LSI tha se Shqipëria rrezikon të humbasë në arbitrazh 2 miliardë dollarë për shkak të prishjes së kontratave me kompanitë. Sipas tij, deri tani nga qeveria janë paguar 80 milionë euro për zgjidhjen e kontratave.
