Pasi ditën e djeshme u konfirmuan me koronavirus tre deputetë, seanca e sotme plenare nuk do të shtyhet, por do mbahet në masa të forta sigurie.
Dy seancat e planifikuara, përkatësisht e sotmja dhe ajo e së enjtes, ku pritet të votohen edhe ndryshimet kushtetuese për hapjen e listave zgjedhore, do të zhvillohen, por kohëzgjatja e seancave dhe e diskutimeve do të jetë e kufizuar.
“Kuvendi i Shqipërisë, që në fillim të pandemisë së COVID-19, ka respektuar në mënyrë rigoroze të gjitha masat mbrojtëse. Me vendim të Konferencës së Kryetarëve, është kufizuar kohëzgjatja e seancave plenare, si dhe koha e diskutimeve. Mbledhjet e komisioneve parlamentare, Byrosë dhe Konferencës së Kryetarëve zhvillohen online. Deputetët në sallë mbajnë maska dhe ulen duke respektuar distancën fizike, duke shfrytëzuar për këtë qëllim edhe mjediset e tjera të sallës së seancave, galerinë dhe lozhat. Janë ndaluar veprimtaritë dhe takimet publike në Kuvend; është pezulluar shërbimi i dokumentacionit arkivor. Janë ofruar masa lehtësuese për punonjësit prindër të fëmijëve të mitur ose me probleme shëndetësore: punë në distancë, orë fleksibël, mundësimi i rritjes së distancës fizike”, ka njoftuar Kuvendi.
Të hënën, Kryetari i Kuvendit, Gramoz Ruçi, iu drejtua me një apel gjithë qytetarëve shqiptarë, për të rritur ndjeshmërinë e tyre ndaj respektimit të masave mbrojtëse ndaj COVID-19.
