Sharkohet Klodian Duro, trajneri që solli të parin trofe në Kukës, ndërkohë që pak më parë edhe Gerd Haxhiu, ai që solli Luftëtarin në Superiore
Në futbollin shqiptar më të pasigurtët vazhdojnë të jenë trajnerët, madje nëse në Europë pankina në përgjithësi konsiderohet si një institucion, këtu asnjëherë nuk ka qenë kështu. Kukësi fitoi për herë të parë në historinë e tij Kupën e Shqipërisë në futboll, nën drejtimin e trajnerit Klodian Duro dhe ishte pikërisht ai që sot u shkarkua. Megjithëse në këtë rast mund të ketë edhe një arsye objektive, pasi sipas drejtorit të ri të klubit verilindor, Duro ishte i konfirmuar, por nuk ra dakord me presidentin për termat financiarë të kontratës së re. Sipas informacioneve, të paktën gjatë ndeshjeve të Europa League, skuadra do të drejtohet nga Hasan Lika, një njohje e vjetër në kampin kuksian, i cili mban edhe postin e Drejtorit Teknik.
Ndërkohë që më parë u largua ish-trajneri i Luftëtarit, Gerd Haxhiu, ai që erdhi bashkë me skuadrën e tij në Superiore, pas katër vitesh mungesë. Por në Gjirokastër, në mes të sezonit është shkarkuar edhe një nga legjendat e futbollit të qytetit, Mustafa Hysi, kur skuadra e tij ishte në vendin e parë, menjëherë pas një barazimi në Elbasan, ndërkohë që në atë takim sulmuesi i Luftëtarit Canka humbi një 11 metërsh, Pra i gjithë kontributi i Hysit u hodh poshtë nga një gabim njerëzor i dikujt nga pika e bardhë. Gjithsesi me Hysin më parë është thyer një rekord po në Gjirokastër, kur e kanë shkarkuar edhe kur kryesonte kampionatin me 9 pikë diferencë nga ndjekësi më e afërt. Por më parë kanë ndodhur edhe gjëra më të çuditshme, si në rastin e Tiranës, një prej klubeve më të mëdhenj të futbollit të vendit, drejtuesit e të cilës kanë larguar trajnerë menjëherë sapo janë shpallur kampionë, siç është rasti i Sulejman Starovës, apo Mirel Josës. Pra trajnerët në Shqipëri janë gjithmonë viktima të humorit të presidentëve, kështu nuk ndikon nëse je kampion, ose quhet normale nëse shkarkohesh edhe nga një penallti e humbur.
