Ish kreyparlamentrja Jozefina Topalli vijon akuzat ndaj kryedemokratit Basha.
Në një postim në profilin e saj ën Facebook Topalli shprehet se Basha ka marrë peng partinë.
Topalli komenton peticionin e demokratëve të Vlorës duke u shprehur se Partia Demokratike nuk është lista sekrete e anëtarësisë që menaxhon Basha.
“Partia Demokratike janë demokratët me shpirt që kanë bërë historinë, demokratët që në Vlore e mbajtën gjallë PD-në edhe në kushtet e terrorit dhe që i njeh si te tille gjithë Vlora”, shprehet ajo duke shtuar se sa më shumë ta përbuzin peticionin, aq më fuqishëm do t’u bjerë në kokë njerëzve të rremë, që i kanë hipur në shpinë PD-së dhe e kanë kthyer ate në plaçkë.
Status i plotë i Jozefina Topallit
Ju që fshihni listat e antarësisë , mos përbuzni demokratet!
Demokratët nëpër Shqipëri kanë nisur një proces proteste për zgjedhjet fiktive të Lulzim Bashës për t’u pastruar kryetar. Një nga nismat e protestës është një peticion i çelur për nënshkrime, me të cilin po kërkohet anullimi i procedurës farse antistatutore.
Deri më sot Basha nuk ka reaguar për akuzën për shkeljen e statutit, për akuzen për pengmarrje dhe për grabitje të Partisë…ka reaguar (nëpërmjet vartësve në hierarkinë partiake) për njeren nga listat me nënshkrime demokratësh, atë të demokratëve të Vlorës. Ka ngritur zerin, sepse shumica e nënshkruesve të listës nuk qenkan në listat e anëtarësisë.
Une nuk i njoh firmëtarët e peticionit dhe nuk ka nevojë t’i njoh. Lëvizja për shpëtimin e PD-së është lëvizje në rritje. Si çdo lëvizje që përfshin dhe bën për vete njerëzit ajo do t’i ketë pranë edhe ata që shkojnë “pas berihajt”, sikurse do ketë me vete dhe ata që duan ta shfrytëzojnë për interesa meskine, apo ta sabotojnë. Prezenca e tyre nuk e zhbën lëvizjen, nuk e dobëson dot. Forca e lëvizjes qëndron tek e vërteta e saj, tek ideali që mbron, tek motivimi parimor.
Ndaj për Vlorën dhe me firmetarët e saj unë di të them jashtë çdo lloj dyshimi, se në Vlore demokratët refuzuan masivisht në zgjedhje “listën Basha”, si listë e shitur dhe aspak përfaqësuese. Pse nuk reagon Basha ndaj ketij fakti të pamohueshem? Përgjigjja është e thjeshte: kush nuk voton Bashën nuk mund të jetë “demokrat”. Demokratët Basha i heq nga lista e anëtarësisë dhe nuk ka nevojë të japë llogari para tyre. I heq nga lista dhe keshtu nuk i lë edhe ta dëmtojnë në zgjedhjet brenda partisë. Lista sekrete ia jep mundesinë të heqë dhe tëvejë, të shpallë “demokrat” ose “armik”, kë të doje, ke i lëpihet pas zverkut dhe kë i prish punë.
Një gjë harron Basha në këtë mes: Partia Demokratike nuk është lista sekrete e anëtarësisë që menaxhon Basha. Partia Demokratike janë demokratët me shpirt që kanë bërë historinë, demokratët që në Vlore e mbajtën gjallë PD-në edhe në kushtet e terrorit dhe që i njeh si te tille gjithë Vlora. Mos i përbuzni ata! Anëtarësinë ne PD ata e kanë fituar vetë, me mundin dhe sakrificën, me privacionet dhe gjakun që kanë derdhur për PD. Nuk ua hiqni dot as me lista të trukuara e sekrete, as me përbuzje e përçarje.
Peticioni i demokratëve bëhet në emër të PD-së dhe për mbrojtjen e saj nga rrënimi. Peticioni nuk mbulohet me shpifje, tallje ose përbuzje. Sa më shumë ta tallin apo përbuzin, aq më fuqishëm do t’u bjerë në kokë njerëzve të rremë, që i kanë hipur në shpinë PD-së dhe e kanë kthyer ate në plaçkë.
