Nga Klodian Tomorri
BBC transmetoi një dokumentar mbi trafikun e qënieve njerëzore. Sipas dokumentarit, në vitin 2015, në Britani u trafikuan për prostitucion 3260 femra. Numri më i madh i viktimave, mbi 600, ishin shqiptarë.
Ka mes tyre fëmijë, vajza nga 14 vjeç, të cilat merren përmes dhunës apo mashtrimit dhe prostituohen në mënyrë barbare. Tragjedi më të madhe se kjo nuk mund të ketë.
Si ka mundësi që një komb, një qeveri, një shoqëri të lejojë një masaker njerëzore kaq barabare në shekullin e 21?
Si ka mundësi që 600 viktima të dhunuara barbarisht nuk i sheh askush?
Keni dëgjuar ju kryeministrin të flasë ndonjëherë për këtë? Keni dëgjuar ministrin e brendshëm, prokurorin e përgjithshëm, drejtorin e përgjithshem të policisë, ta zënë ndonjëherë në gojë këtë batërdi monstruoze? Keni dëgjuar ndonjë deputet në Parlament të flasë, qoftë 20 sekonda për këtë tmerr? Asnjëherë!
Kërkush nuk i sheh, megjithëse vuajtjet e tyre nuk mund të tregohen me fjalë.
Një komb nuk mund të ketë tragjedi dhe çnderim më të madh se kaq. Por prapë, askujt nuk i intereson!
Këto viktima nuk kanë vota. Meqë nuk kanë vota politika nuk i sheh kush. Ato nuk kanë lekë. Meqë nuk kanë lekë nuk i intereson askujt të merret me to.
Në armatën e krimit, ata që trafikojnë dhe prostituojnë femrat, janë raca më e ndyrë. Por, ne nuk i ndjekim trafikantët. Në vend që t’i çojmë pas hekurave, i çojmë në parlament.
Ndyrësi. Çdo fëmijë, vajzë, motër apo nënë e trafikuar është një njollë e madhe turpi për të gjithë ne, pa përjashtim. Por, mbi të gjitha është një turp për ata, që janë mandatuar me pushtet dhe që si bastardë, qëndrojnë indiferentë përpara kësaj gjëme.
Ndyrësi!
