Rama e Basha dy kryebashkiakët që i vodhën rrugën qytetarëve. Betonizimi si mallkim që po i ndjek pas kryeqytetasit edhe nën qeverisjen e Erjon Veliajt
E shihni këtë video?! Është një trotuar që nis në gjërësinë rreth 1 ose 2 metër dhe sa më shumë të ecësh, aq më shumë ngushtohet deri sa bëhet zero. Këtu mbaron trotuari dhe këmbësori është i detyruar të ecë në rrugën e makinës, atje ku përballë të vjen vetimthi automjeti i radhës, sepse është në rrugën e vet dhe këmbësori s’mund të ankohet. Kështu janë shumica e rrugëve të Tiranës.
Ky filmim është realizuar nga 27.al në një prej rrugëve të kryeqytetit. Në shumë rrugë e rrugica të tjera të kryeqytetit janë realizuar fotografi, të cilat japin të njëjtën pamje, trotuare të shkurtra e të ngushta rreth 20 cm ose rrugë pa trotuare fare. Në shumë prej tyre ka copëra trotuaresh që të gënjejnë e nis të ecësh atje e pastaj vihesh me shpatulla në mure për të ecur pak metra drejt destinacionit…. Imagjinoni një mama me beben e saj në karrocë, e cila niset nga shtëpia për ta çuar në kopësht fëmijën e saj, apo për një shëtitje?!
Sa e lehtë është për të, të kalojë çdo ditë në këtë rrugë pa trotuar. Imagjinoni një të moshuar se çfarë beteje e përditshme i duhet për të kaluar nëpër rrugicën e banesës së tij. Nuk mund të diskutosh më pas që në këtë trotuar të kalojë një invalid me karrocën e tij. Në çdo lagje ka fëmijë, ka të moshuar, mund të ketë edhe invalid, por rrugët nuk i plotësojnë as minimumin e standardeve duke u bërë në shumicën e sipërfaqes së kryeqytetit të pakalueshme.
Si kjo rrugë që shfaqet në video pa trotuarë, janë shumica dërrmuese e rrugëve të Tiranës. Një qytet i pushtuar nga betoni, ku babëzia e ndërtuesve ka shkuar deri atje sa i ka grabitur qytetarëve këmbësoret e tyre. Kjo babëzi lidhet pikërisht me ata që e drejtuan Tiranën këto 15 vitet e fundit.
Betonizimi i Tiranës ka nisur masivisht në mandatin e parë të kryebashkiakut Rama në vitin 2000-2011 dhe ka vazhduar deri tek kryebashkiaku Basha në mandatin 2011-2015. Edi Rama qëndroi për 11 vite në krye të Bashkisë së Tiranës, kohë kur ka ndodhur pjesa më e madhe e betonizimit. Ndërsa Lulzim Basha ka qëndruar katër vite në krye të kësaj bashkie duke kontribuar gjithashtu në betonizimin e Tiranës dhe sjelljen deri në këtë formë të një qyteti me standarde të mjerueshme.
Kryesisht Rama, por edhe Basha, i kanë dhuruar kryeqytetasve një vend praktikisht të pabanueshëm. Këta të dy që e drejtuan Tiranën 15 vjet i kanë hequr të drejtën qytetarëve të ecin në rrugën e tyre. Kur nuk mundën e as patën dëshirë t’i japin Tiranës minimumin, rrugën për të ecur, e pamundur të besojmë se këta dy liderë, në krye të dy partive të mëdha, do të mund t’i japin Shqipërisë rrugën e duhur drejt qytetërimit, drejt Bashkimit Europian, që vazhdojnë e premtojnë përditë.
Prej Qershorit të vitit 2015, në krye të bashkisë së Tiranës është Erion Veliaj. Ai ka premtuar se do bëjë çudira për Tiranën. Por një gjë është e sigurt se nuk ia kthen dot qytetarëve, sepse është e pushtuar nga betoni. Nëse nuk vazhdon ta betonizojë akoma më shumë këtë qytet, do të jetë nderi më i madh që i bën qytetarëve.
