Drejtori i zyrës për çështjet e Evropës Jugore: Në rastin e gjyqtarëve atyre u janë mohuar vizat dha baza e këtij mohimi ka qenë korrupsioni, e njëjta praktikë do të jetë edhe për pushtetarët
Drejtori i zyrës për çështjet e Evropës Jugore dhe Qendrore, Thomas Yazdgerdi tha çdo pushtetar shqiptar që kërkon viza për në SHBA, do të verifikohet në se është i përzier në korrupsion. Në një intervistë për “Zëri i Amerikës”, Thomas Yazdgerdi tha se një praktikë e tillë bazohet tek dekretet e Presidentit dhe është praktikuar në rastin e disa gjyqtarëve shqiptarë.
“Në rastin e gjyqtarëve atyre u janë mohuar vizat dha baza e këtij mohimi ka qenë korrupsioni. Në Shtetet e Bashkuara një praktikë e tillë bazohet ligjërisht tek dekretet presidencialë dhe kohët e fundit është përdorur në rastin e disa gjykatësve në Shqipëri. Çdo pushtetar që kërkon vizë për në Amerikë, mund të jetë objekt i këtyre dekreteve. Ne do t’i shqyrtojmë rastet për të parë nëse një gjë e tillë është e justifikuar”, tha Thomas Yazdgerdi.
Për reformën në drejtësi zyrtari amerikan thotë se pret të miratohet shumë shpejt, pasi sipas tij palët janë afër konsensusit dhe se qytetarët shqiptarë duan një sistem drejtësie të pakorruptuar.
Drejtori i zyrës për çështjet e Evropës Jugore i kërkon qeverisë të miratojë ngritjen e Byrosë së Hetimit, por ta bëjë këtë me një mbështetje të gjerë dhe konsensus politik.
“Eshtë e rëndësishme që qeveria të arrijë të miratojë, me sa më shumë mbështetje që mundet, ligjet përkatëse për këtë Byro. Ne e dimë se qeveria është e interesuar për të patur një Byro Kombëtare Hetimi, pak a shumë si FBI-ja amerikane. Ne mendojmë se kjo është një ide e mirë dhe e mbështesim atë. Ajo do të merrej me ndjekjet penale të nivelit të lartë, me korrupsionin në nivele të larta. Kjo është e rëndësishme”, tha Yazdgerdi.
Zyrtari amerikan vlerësoi qëndrimin e Shqipërisë për çështjen e muxhahedinëve duke shprehur mirënjohje për ndihmën në këtë drejtim, nuk zbuloi asnjë shifër, por tha se ky proces po zhvillohet në mënyrë të efektshme.
