Partia Demokratike i kërkon Ramës shkarkimin e Tërmet Peçit. Ndërsa sipas Tritan Shehut, deputet i Gjirkostrës edhe Prokuroria duhet të fillojë hetimet ndaj kryebashkiakut të Tepelenës, i cili këndoi në nder të ish-diktatorit, Enver Hoxha.
Statusi i plotë i Shehut:
I kërkoj Kryeministrit, si deputeti Qarkut, të shkarkojë menjëherë kryetarin e Bashkisë së Tepelenës,Termet Peçi. Gjithashtu Prokuroria duhet të veproje ndaj tij për shkelje të ligjit.
I bëj thirje opinionit publik, mediave, shoqatave të ish të përndjekurve politikë të reagojnë me forcë ndaj këtij skandali e turpi të vërtetë!
Tërmeti i “bëmave të mëdha”, mbrëmë në darkën zyrtare të shtruar nga Bashkia e Tepelenës me rastin e 75-vjetorit të çlirimit të saj, i thur lavde e këndon për diktatorin Hoxha, gjë që më tej e publikon.
Një sfidë e vërtetë kjo ndaj ligjit, demokracisë, një ofendim ky për proceset tona demokratike, një arrogance e pa kufi ndaj ish të persekutuarve, ndaj gjithë këtij populli, që e pagoi shumë shtrenjtë atë diktaturë të egër.
Një përbaltje kjo edhe e të gjithë atyre, që ranë apo luftuan fashizmin e nazizmin, për një Shqipëri të lirë, demokratike, të begatë, pavarësisht nga mënyra se si ata e perceptonoin këtë në vitet e asaj lufte epokale.
Ishte ai diktator e ajo diktaturë, që tradhtoi e shkeli edhe mbi gjakun e sakrificat e tyre, qoftë edhe të popullit atdhetar e liridashës të Tepelenës, që njohu gjate saj veçse vuajtjet, persekutimet, varfërinë.
Çdo të ndodhte në Gjermani apo Itali sikur një Kryetar Bashkie t’i thurte lavde në një ceremoni zyrtare Hitlerit apo Musolinit!?
A mund të më përgjigjeni për këtë ju Z.Kryeministër?,”, ka shkruar ai.
