Në një bashkëbisedim me intelektualë në Tiranë, ish-kryeministri Sali Berisha ka reaguar për hapjen e tenderit për ndërtimin e aksit rrugor, Milot-Fier. Berisha tha se një tender i tillë bëhet në një kohë kur borxhi publik në vend është fundosës. Sipas tij, borxhi është 107% dhe nuk do të jetë e largët koha kur Greqia do të duket “lule”.
“A jemi në krizë ne sot? Sot mediat njoftojnë se u rrit me 10% çmimi i qumështit. Po të shkosh në brigjet tona sot janë bosh. Sepse për të shkuar nga Tirana në Palasë, shpenzojnë nga 130 mijë lekë naftë, më tha një miku im. Sot ky zotëri, bashkë me mëkëmbësen e tij, njoftuan se po hapin tenderin për autostradën blu, Milot-Fier. Në një kohë kur borxhi publik është fundosës për këtë vend. Nuk do jetë e largët dita kur Greqia do të duket lule këtu. Është 107% borxhi. Kaq është preukopimi i këtij njeriut. Ndjeshmëria e tij ndaj këtij realiteti është zero. Ai është i lumtur. Ai jeton në lumturinë e tij. Jeton në saraje, me avion në dispozicion, jeton me çdo gjë, kurse se çfarë ndodh me qytetarët, ai nuk ka asnjë preukopim. Ne kaq sa jemi, renditemi në pozicionin e 118 në botë për të ardhurat për frymë. Ne renditemi në 4 vendet me vdekshmëri më të lartë nga koronavirusi në botë. Po të them se po i vrau qeveria, atëherë e ekzagjeroj. Por ju them me bindje se shkaku i këtij niveli vdekshmërie ishte qëndrimi i asaj ministreje dhe këtij kryeministri. Ikën 20 mijë qytetarë, ikën duke mashtruar numrin e vdekjeve me 5-6 herë. Si ikën? Ikën sepse njerëzit nuk i shtronin në spitale. Kosova shtronte 2.5 herë më shumë se Shqipëria. Kosova me 2 mln banorë, kishte 1150 shtretër në dispozicion. Kurse ne 450-500 dhe ndonjëherë shkonin tek 650” – tha Berisha.
