Ka than' i moçmi: 

“Shqiptari e ka zakon që kundështon para se të marrë vesh".

                          -Faik Konica

Tani që Teatri Kombëtar kaloi në dorën e Kushtetueses, çfarë do të ndodhë?

Nga Ejona 0

Ndërkohë që retorika mes kreut të Bashkisë së Tiranës, Erion Veliaj dhe aktivistëve që mbrojnë Teatrin Kombëtar, ishte përshkallëzuar, një njoftim interesant erdhi nga Gjykata Kushtetuese.

Një shkresë e shpërndarë edhe në media tregon se Gjykata Kushtetuese ka vendosur të marrë në shqyrtim kërkesën e Presidentit Ilir Meta për shfuqizimin e ligjit që i hap rrugën projektit të Teatrit të ri Kombëtar, duke e kaluar çështjen në seancë plenare.

Për këtë, Gjykata Kushtetuese i është drejtuar me shkresë 5 institucioneve, duke kërkuar që deri më datë 22 janar 2020 të dërgojnë argumentet e tyre mbi këtë çështje.

Shkresat u janë dërguar para katër ditëve Ministrisë së Financave, Ministrisë së Kulturës, Bashkisë së Tiranës, Kuvendit të Shqipërisë dhe Këshillit të Ministrave, ku theksohet se argumentet e këtyre institucioneve çmohen si të domosdoshme për zhvillimin korrekt të gjykimit.

Vendimi për të kaluar çështjen në seancë plenare me dyer të hapura është marrë nga Kolegji i Gjykatës Kushtetuese më datë 24 dhjetor 2019, ndërkohë që në bazë të Ligjit për funksionimin e Gjykatës Kushtetuese, për ta gjykuar çështjen në seancë nevojitet një kuorum prej 6 anëtarësh.

Por deri më tani Gjykata Kushtetuese ka vetëm katër anëtarë. Një vendim për pezullimin e efekteve të ligjit do të ishte i pamundur për momentin.

Aleanca për Mbrojtjen e Teatrit e ka përshëndetur vendimin e Gjykatës Kushtetuese, ndërsa paradite protestoi përpara Bashkisë së Tiranës duke kërkuar transparencë informative për ligjin mbi teatrin. Fakt është se seanca e Kushtetueses do të ofrojë së paku më shumë transparencë për këtë çështje.

Erion Veliaj ka paralajmëruar se në janar do të nisë prishja e Teatrit Kombëtar për t’i hapur rrugë projektit të ri.

Mbetet të shihen zhvillimet në vazhdim, në një kohë kur Kushtetuesja e ka dhënë një sinjal se çdo veprim me Teatrin Kombëtar do të jetë më i komplikuar tani që çështja është në dorën e saj, edhe pse pa numrin e anëtarëve të nevojshëm.

Loading...

Lini një koment

Adresa juaj e Email-it nuk do të bëhet publike

Mund të përdorni HTML tags dhe atributet: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

gjithësej