Kryeministri i Kosovës, Ramush Haradinaj pas përfundimit të takimit me krerët e shtetit dhe disa ministra të kabinetit qeveritar, ka dhënë detaje për temat që u diskutuan.
Ai ka thënë se në takim u folën të gjitha zhvillimet e fundit në vend. “Kam pasur takim me ambasadorin amerikan, Philip Kosnett, për të cilin kam respekt, është njëri i zoti dhe i përfaqëson më së miri Amerikën.
Ai ka kërkuar dhe ka sugjeruar që të pezullohet taksa, e ne kemi pasur rastin edhe të tregojmë se e duam Amerikën, por nuk i nënshtrohemi Rusisë dhe Serbisë”, ka theksuar Haradinaj.
Shefi i ekzekutivit të Kosovës ka thënë se taksa nuk është vendosur kundër Amerikës, por për shkak të konfliktit të ngrirë me Serbinë.
“Ne kërkojmë një marrëveshje ligjore gjithëpërfshirëse për njohjen, ku do të përfshihej tregtia e lirë dhe njohja, unë jam jo të pezullohet por të hiqet krejt taksa. Unë jam i vendosur dhe e kërkoj mirëkuptimin e të gjithëve, nuk është dëshira ime, as qëllimi, as arrogancë e trimëri e pavend, por e lus Amerikën të na kupton ne që e duam Amerikën më së shumti në botë. Nuk mundemi më me iu nënshtrohu Serbisë e me bo hajgare me neve, me na kontestu pikat kufitare, anëtarësimin në Interpol etj”, ka thënë tutje Haradinaj.
