Ndërsa në Parlament zhvillohej seanca e radhës, vëmendja e medias dhe e publikut ka qenë e përqendruar te konferenca e Saimir Tahirit. Duke folur me nota të ashpra ndaj të gjithë klasës politike që ka qeverisur Shqipërinë në këto 25 vite, Tahiri dorëzoi mandatin e deputetit. Ai theksoi se në kohën kur drejtoi ministrinë dhe i shërbeu qeverisë kultivimi i hashashit ishte më pak sesa në vetëm një vit të qeverisë Berisha, por sipas tij këtë nuk e thotë asnjë nga socialistët.
“Unë u përpoqa, mbajta edhe palaçot e politikës në kurriz duke më bërë moral. Ta dini për statistikë: Hapni shifrat e GdF, në 4 vjet të qeverisë ku shërbeva edhe unë, t’i mbledhësh bashkë, kultivimi i hashashit është më pak sesa vetëm 1 vit i Sali Berishës kur ishte Kryeministër. Nuk e thotë njeri këtë. Për fat të keq as deputetët e PS. As ministri i brendshëm s’e ka përmendur kurrë. As kryeministri jo. Nuk e di pse”, deklaroi Tahiri.
Tahiri gjithashtu tha se ministri i Brendshëm po ia nxin faqen vendit duke numëruar në televizor bandat.
“Rri e dëgjoj garën se kush e gjen e kush e kap peshkun e madh. Ca thonë banda është në pushtet, ca në parlament, ambasadorë lart e poshtë flasin për mafiozë dhe banda shqiptare, edhe ministri Brendshëm numëron në televizor bandat, një tmerr për të marrë valixhet e për të ikur. Ka më shumë kriminalitet në Itali, po askush nuk numëron bandat në televizor. Ka më shumë në Greqi po përsëri s’e bëjnë. Ka më shumë vrasje, drogë, prostitucion kudo në botë, por askush nuk ia nxin faqen vendit të vet sa bëjmë ne, për të na fërkuar pak kokën ndonjë i huaj e për të bërë karrierë në kurriz të të tjerëve”, tha ish-ministri.
