Superioria në javën e nxehtë, Nica dorëhiqet nga Laçi

Me Tërbuni – Laçi ka filluar java e 27-të e Kategorisë Superiore, një ndeshje në dukje rutinë, por që nuk kaloi pa pasoja. Laçianët kanë barazuar vetëm në minutën e fundit të shtesës me anë të Nimanit, ndërkohë që pukjanët kanë shënuar më parë me Karakaçin dhe për atë çka dhanë në fushë, e meritonin plotësisht të fitonin për herë të parë pas 12 javësh. Dhe duhet thënë që është një skuadër që po i shërben kampionatit, pasi ende nuk është dorëzuar, megjithëse futbollistët dhe stafi kanë rreth 7 muaj pa u paguar. Ndërsa Laçi e ka humbur grintën, agresivitetin, cilësinë, pra ka humbur gjithçka dhe trajneri Stavri Nica ka vendosur të largohet. “Unë po jap dorëheqjen, pasi skuadra nuk po më përgjigjet më”, ka thënë pas ndeshjes tekniku durrsak, të cilit aq e pashpresë i duket gjendja, saqë ka vendosur ta braktisë edhe kupën e Shqipërisë, ku Laçi është një nga gjysmëfinalistet e kompeticionit.

Ndërkohë pritet që kjo të jetë një javë e nxehtë, madje që edhe mund të vendosë në objektivat e disa skuadrave. Shkodranët do të diskutojnë në Ballsh një tjetër “derbi” mbijetese, ndrësa Skënderbeu, pas polemikave që vazhdojnë pas takimit me Partizanin në “Qemal Stafa” do të presë Flamurtarin. Janë dy ekipe me objektiva të kundërta, por në këtë fazë kampionati edhe për vlonjatët çdo pikë ka një rëndësi të veçantë. Të kuqtë do të udhëtojnë për në Durrës, në një kohë që djemtë e Maganit vazhdojnë të luajnë gjithçka për një vend në Europa League. Dhe në fund Tirana e halleve të mëdha do të inagurojë edhe sistemin e ndriçimit të “Selman Stërmasit” përballë Kukësit të Duros, që ka arritur katër fitore rresht dhe po i afrohet nga paraqitja skuadrës së sukseshme të dy sezoneve të fundit.