Dy ditë pas ndeshjes së Kombëtares ndaj Maqedonisë do të startojë edhe Kategoria Superiore e kampionatit tonë. Pas fazës përgatitore dhe merkatove të bollshme, duket se skuadrat janë gati dhe që nga e mërkura do të fillojmë të kuptojmë edhe për objektivat e 10 pjesmarrësve në elitën e futbollit të vendit. Ndërkohë që mahnia për të thirrur futbollistë të huaj vazhdon, madje për të qenë më të saktë është shtuar. Gjatë këtij edicioni pritet të jenë pjesë e skuadrave tona rreth 50 lojtarë që nuk kanë pasaportë shqiptare, pothuajse nga të gjitha kontinentet, ndërsa po llogaritësh edhe ata që do t’i bashkohen ekipeve të Kategorisë së Parë, numri i të huajve ndoshta do të dyfishohet. Administratori i Flamurtarit, Sinan Idrizi, është një nga ata që nuk ka fare besim tek futbollistët vendas dhe kësisoj nuk ka sesi të mos mbajë edhe rekordin e të huajve të federuar, plotë 11, të cilët duhet të konkurojnë për 4 vende në fushën e lojës.
Superliga, java e parë/ e mërkurë, 7 shtator
Korabi – Laçi (Selman Stërmasi)
Skënderbeu – Flamurtari (Skënderbeu)
Luftëtari – Partizani (Elbasan Arena)
Vllaznia – Kukësi (Loro Boriçi)
Teuta – Tirana (Niko Dovana)
