Sot, në orën 10:00 studentët kanë paralajmëruar një protestë para Ministrisë së Arsimit kundër mbylljes së universiteteve dhe kundër mësimit online.
Siç njoftohet nga vetë ata rreth orës 11.00 protesta me sa duket do të zhvendoset drejt Ministrisë së Shëndetësisë.
“Ditën e hënë në kundërshtim të një vendimi të padrejtë dhe të paarsyetuar, studentët në mbarë vendin do të mbajnë një protestë kombëtare”,- thuhet në njoftim.
Vendimi i Komitetit Teknik të Ekspertëve ka irrituar edhe studentët e rretheve, të cilët kishin gjetur shtëpi me qira apo kishin paguar konviktet dhe tani do t’ju duhet të kthehen nëpër vendbanimet e tyre.
Ndërsa Drejtoria e Qytetit Studenti dhe Rezidencat 1 dhe 2 përmes një njoftimi një ditë më parë ka sqaruar studentët, të cilët kanë kryer pagesat për konviktet, se detyrimi i paguar i nëntorit do të mbartet në dhjetor.
