Studentët shqiptarë janë të pakënaqur me tarifat që paguajnë për të ndjekur studimet universitare. Të revoltuar për tarifat e papërballueshme, ata kanë dalë sot në një protestë.
Me pankarta në duar të rinjtë shqiptarë janë shprehur kundër një politike arsimore që e ka shndërruar universitetin në një biznes ku mund të shkollohen vetëm ata që kanë mundësi për të paguar.
“As veshka nuk ma mbulon tarifën”, ka shkruar një student në pankartën e tij.
Kërkesat e studentëve janë:
1) Të përgjysmohen tarifat studimore në të gjitha degët dhe nivelet e studimeve;
2) Të hiqet barra financiare për certifikimin e gjuhës së huaj;
3) Të hiqet pagesa dyfish e krediteve për provimet e mbartura;
4) Në solidaritet dhe bashkë me studentët e Fakultetit të Gjeologjisë dhe Minierave, kërkojmë që qeveria t’i kthejë godinën e saj historike FGJM-së.
