Studentët vijojnë bojkotin. Studentët e Juridikut kanë bllokuar sot hyrjen e fakultetit me karrige e tavolina, duke u ngujuar brenda ambienteve të universitetit. Kjo formë e re bojkoti parashikohet të aplikohet edhe në universitete të tjera, ndërkohë që kreu i qeverisë deklaron se prindërit po ankohen për pengimin e dhunshëm të mësimit. Ai thekson se pas këtyre aksioneve, fshihen qëndrime politike.
Rama ka publikur tre statuse e të njëpasnjëshme në Twitter, ku ka shkruar:
1/U kërkoj ndjesë e mirëkuptim studentëve e prindërve, që përmes mijëra mesazhesh ankohen për pengimin e dhunshëm të mësimit. Përbuzje për politikën që fshihet pas këtij agresioni të papranueshëm ndaj Universitetit. Kjo maskaradë s’do ta devijojë dot rrugën e nisur me studentët.
2/Universitetet kanë dorëzuar në Ministrinë e Arsimit të gjitha listat e studentëve që do të përfitojnë mbështetjen tonë financiare, sipas Vendimit të Qeverisë. Ministria e Financave ka nisur sot punën për të realizuar alokimin e fondeve në çdo universitet, student për student.
3/Nesër është gati për prezantim publik portali i Programit të ri Kombëtar të Punësimit në administratë të studentëve më të mirë. Ky program është një nga risitë e reflektimit mbi protestën, i cili na çoi shumë përtej 8 kërkesave.#QentëLeTëLehin ne do shkojmë së bashku përpara.
