Të bëhesh specialist futbolli në Shqipëri është gjëja më e lehtë, madje shumë pak kohë të duhet dhe kjo jo për të mësuar, por vetëm për t’i mbushur mendjen vetes që “t’i vlen”. Pikërisht kjo sindromë duket se e ka mbërthyer edhe Ekrem Spahinë, që për hir të së vërtetës duhet thënë që e ka pasur një lidhje me futbollin. Vite më parë ka deklaruar me pompozitet në një nga ekranet e televizioneve të vendit, se ka qenë Ahmet Zogu ai që ka ndikuar në pranimin e Shqipërisë në FIFA, ndërsa tani i ka pasuruar dijet e tij për këtë sport, pasi thuhet se e ka lënë pa fjalë edhe trajnerin Klodian Duro përsa i përket skemave taktike. Ish-futbollisti i Kombëtares, aktualisht trajner i Kukësit, sipas shtypit është larguar nga seanca stërvitore e ditës së djeshme në shenjë proteste, pas debateve të ashpra me drejtorin Spahija. Gjatë 11 ndeshjeve nën drejtimin e tij, skuadra verilindore ka arritur 8 fitore, 2 barazime dhe vetëm 1 humbje, atë me Partizanin javën e shkuar. Megjithatë, presidenti Gjici ka deklaruar se trajneri ka munguar për arsye familjare, duke hedhur poshtë zërat dhe kjo do të ishte më e mira, pasi pikërisht sot Kukësi do të ketë një ndeshje shumë të vështirë në transfertën e Vlorës dhe nëse Klodi nuk kthen mendje drejtorit ndoshta do t’i duhet ta zëvendësojë në pankinë.
