Dje, u shkarkua vetë, sot shkarkon të tjerët.
Dispozitat e ligjit nr. 84/2016, “Për rivlerësimin kalimtar të gjyqtarëve dhe prokurorëve”, megjithëse në përmbajtje të tyre, paraqiten tepër të zgjeruara, të paqarta dhe të paparashikueshme, kanë parashikuar disa kritere, të cilat dhe me këtë problematikë të spikatur nuk janë zbatuar për zgjedhjen e anëtarëve të KPK e KPA.
Një tjetër anëtare e KPK sipas shkresës nr. 2056/1 prot dt. 07.05.2020 të Këshillit të Lartë Gjyqësor rezulton të jetë shkarkuar nga KLD me vendimin nr.08.dt. 23.08.1996. Ajo është ish-gjyqtarja e Gjykatës së Rrethit Gjyqësor Lushnjë zonja Alma Vokopola (Faskaj).
Dhe çudia qëndron në faktin se është shkarkuar nga detyra për shkelje të ligjit dhe paaftësi profesionale në detyrë.
Nga kjo shkresë që pason skandalet e mos zbatimit të kriterve dhe për anëtarët e tjerë të KPK dhe KPA po provohen çdo ditë e më tepër zërat se organet e vetting-ut, të ngarkuara me zbatimin e këtyre dispozitave ligjore të Reformës në Drejtësi, janë pothuaj plotësisht të përbëra nga anëtarë jo-gjyqtarë, të cilëve u mungon profesionalizmi dhe përvoja e nevojshme për të trajtuar çështje tepër komplekse që përfshin procesi i vetting-ut. Dhe mjafton besoj motivi i shkarkimit të kësaj anëtare të KPK, për të provuar se sa profesional dhe objektiv është vetting-u.
Kështu që zërat se pjesa më e madhe e anëtarëve të Komisionit të Pavarur të Kualifikimit janë emëruar politikisht, pa plotësuar kriteret e ligjit për formim të lartë profesional, tregues të vlerësimit të lartë në punë, grada shkencore, përvojë të spikatur e të tjera, po provohen çdo ditë e më shumë me shkresa që dalin si kërpudha pas festave e gëzimeve për Reformën e suksesshme.
Tani që shkresa flet vetë, të shohim se çfarë marifeti shpjegues do na dalë nga goja e reformatorëve, parlamentarëve apo mediave pranë reformatorëve. Një gjë është e sigurtë, kanë shkelur ligjin tërë jetën tani vlerësojnë të tjerët. Janë totalisht të paaftë të vlerësojnë sa bukur kanë shkruar ish-kolegët e tyre vendimet. Ja pra, këto janë kritere! Duhet së pari të shkelësh ligjin, e së dyti të jesh i paaftë. Kështu e ke një vend të sigurtë në reformat rilindase.
Siç duket në moralin popullor ka lënë gjurmë të thella kënga partizane “Nga këto maja rripa-rripa…”.
