Deputetja e PD, Jorida Tabaku, akuzon kryeministrin Edi Rama se ofron taksat dhe sigurinë e shqiptarëve me koncesion. Sipas saj hapi i parë i fiskalizimit iu dha me koncesion një kompanie kroate me kontratë 15 milionë euro. Sipas saj, shtimi i kontratave me PPP po thellojnë edhe më tej krizën në vend, duke iu shtuar kështu barrën qytetarëve.
“Rama ofron taksat dhe sigurinë e shqiptarëve me koncesion .Një koncesion prej 15 mln euro dhënë me paracaktim një kompanie kroate nisi hapin e parë të Fiskalizimit. Kur qeveria e mbronte këtë koncesion, kam paralajmëruar që kostoja do t’i shkojë biznesit dhe për rrjedhojë qytetarëve.
Kur buxheti 2022 po diskutohej në komision ngrita shqetësimin për PPP/koncesionin për “Çelësat elektronikë” që qeveria i ka miratuar si koncesion. Kjo do të thotë që tanimë çelësat elektronikë do të jepen me koncesion me vlerë tek 4,5 mln euro që do të dalin nga buxheti i shtetit, pra taksat e shqiptarëve. Kështu ndërsa kriza energjitike pritet të mbulojë edhe Shqipërinë, ndërsa kriza e çmimeve ka prekur familjet shqiptare qeveria vazhdon avazin me PPP-të.Përtej kostove të larta që pritet të ketë në buxhet, kostove të larta që do të ketë për bizneset i shtohet dhe një rrezik tjetër; siguria e të dhënave të biznesit”, shkruan Tabaku.
Sipas deputetes, literalisht janë hapur dyert e biznesit tuaj për një palë të tretë që di gjithçka.
