Letra e Komitetit Antifashist të Emigrantëve Çamë, drejtuar OKB-së për genocidin ndaj Çamërisë
Memorandumi drejtuar Asamblesë së Kombeve të Bashkuara, në vitin 1946, është ndër përpjekjet e para zyrtare të popullsisë çame për të kërkuar të drejtat e tyre të dhunuara përmes genocidit grek.
Në memorandumin drejtuar OKB-së paraqitet situata dramatike e popullsisë çame të përndjekur nga Napoleon Zerva si dhe kërkesat e kësaj popullsie drejtuar Organizatës së Kombeve të Bashkuara. Një ndër kërkesat e popullsisë çame ishte edhe riatdhesimi në trojet e pronat e tyre si dhe kompensimi i të gjitha dëmeve të shkaktuara gjatë genocidit.
Komiteti Antifashist i Emigrantëve Çamë, ishte institucioni që i drejtoi Memorandumin OKB-së, më 25 shtator 1946. Një broshurë, e cila përmbledh detaje të rëndësishme të historisë së dhimbshme të popullsisë çame, u botua në vitin 1946. Atje përmblidhen shifrat e genocidit grek ndaj shqiptarëve të Çamërisë, detaje rreth vrasjeve barbare që famëkeqi Napoleon Zerva kreu mbi popullsinë shqiptare të Çamërisë.
Më poshtë publikohen dokumente zyrtare të marra nga Arkiva e Shtetit, të cilat konfirmojnë shifrat e frikshme të genocidit grek ndaj çamëve, por edhe dëmet materiale që ata pësuan. Në broshurë përfshihet një formular mjaft interesant, përmes të cilit, popullsia çame regjistrohej. Në pyetësorë ka një zë për deklarimin e pasurive që familjet çame kishin lënë në trojet e tyre në Çamëri.
