Tre shqiptarë të akuzuar për trafik droge ne Belgjike janë zhdukur pa lënë gjurmë ditën e gjyqit, duke u shpallur në kërkim dhe duke humbur mijëra euro garanci. Dyshohet se ata janë arratisur drejt Shqipërisë për t’i shpëtuar drejtësisë belge.
Seanca gjyqësore u zhvillua në Gent, por asnjëri prej tyre nuk u paraqit, çka ka forcuar dyshimet se ata kanë braktisur vendin. Si pasojë, autoritetet belge i kanë shpallur në kërkim dhe kanë nisur procedurat për kapjen e tyre.
Ngjarja që çoi në zbulimin e rastit daton më 6 tetor 2024, kur policia ndaloi një automjet në zonën Gent-Zuid. Gjatë kontrollit u gjetën sasi kanabisi dhe 3,100 euro cash, ndërsa hetimet morën kthesë pasi në telefonat e të dyshuarve u zbuluan mesazhe që lidhen drejtpërdrejt me shitjen e drogës.
Në vijim, autoritetet zhvilluan kontrolle në disa banesa, ku u gjetën prova të forta për aktivitetin kriminal. Në një apartament në Edward Pynaertkaai u sekuestruan materiale që lidhen me kontabilitetin e drogës, para cash dhe substanca narkotike. Në një tjetër adresë në Oosteeklostraat u zbuluan 169 gramë kokainë dhe 4,000 euro, ndërsa në Hagelandkaai u sekuestruan edhe 119 gramë kokainë.
Sipas Prokurorisë belge, provat tregojnë për ekzistencën e një grupi të strukturuar kriminal, ku njëri prej shqiptarëve kishte rol drejtues, ndërsa dy të tjerët vepronin si zbatues.
Për ta janë kërkuar dënime deri në 40 muaj burg, gjoba deri në 8 mijë euro dhe konfiskim pasurie. Megjithatë, avokatët mbrojtës kanë kundërshtuar akuzat, duke pretenduar se nuk ka prova të mjaftueshme për një organizim të mirëfilltë kriminal.
Arratisja e tyre ka sjellë edhe pasoja të menjëhershme financiare, pasi tre të pandehurit kanë humbur garancitë prej 10 mijë dhe 8 mijë eurosh që kishin depozituar për të qëndruar në liri, ndërsa tashmë janë në kërkim ndërkombëtar.
gijotina.com/
