Bekim Balaj, shkodrani që ngriti peshë Shkodrën dhe të gjithë vendin, duke i dhënë Kombëtares tri pikë shumë të mundimshme
Aq shumë e kërkuan në stadiumin e tyre dhe pikërisht ishte ai që shënoi. Bekim Balajt dhe Shqipërisë i mjaftuan 15 minutat e mbetura të ndeshjes pas ciklonit të mbrëmshëm, për të arritur fitoren e madhe ndaj Maqedonisë. Pra, pas golit të mbrëmshëm të Sadikut dhe sot të sulmuesit shkodran, Kombëtarja jonë ka 3 pikë pas takimit të parë, por aq sa edhe Spanja e Italia, skuadra që fituan mbrëmë përkatësisht 8-0 ndaj Lihtenshtejnit dhe 1-3 ndaj Izraelit. Duhet theksuar që Balaj ishte ai që shënoi golin në ndeshjen e hapjes së kualifikueseve të Euro 2016, në Aveiro kundër Portugalisë, kur tanët fituan 0-1 dhe në fund të asaj fushate eleminatore u kualifikuan për në finalet e Francës. Megjithatë, kjo ndeshje ka filluar një ditë më parë dhe ato 75 minuta, deri në ndërprerjen e takimit lanë shumë për të dëshiruar dhe trajneri De Biazi ndoshta duhet të mendohet më shumë për të zgjedhjet përfundimtare. Ledion Memushaj ndoshta duhet të vazhdojë të jetë titullar, jo vetëm sepse goli i sotëm erdhi pas një harkimi të mrekulluehëm nga këmbët e tij, por është edhe një futbollist me shumë fantazi, pikërisht ajo që i mungon këtij ekipi. Jo përballë çdo kundërshtari mund të fitohet me muksuj dhe difekti ynë më i madh është kur kemi përballë një kundërshtar që na pret, pasi në të tilla raste, në përgjithësi nuk dimë ku çojmë topin. Kuptohet që tashmë për De Biazin është bërë më e vështirë, pasi kjo skuadër vjen nga vitrina e futbollit të kontinentit dhe është në qendër të vëmendjes, sigurisht edhe të kritikave, ndonjëherë të ekzagjeruara.
