Forumi i Gruas në PDIU pati sot një takim për procesin e anëtarësimeve dhe zgjedhjeve në parti. Të pranishëm në këtë takim ishin kryetari i PDIU-së, z.Shpëtim Idrizi, deputetët Mesila Doda e Tahir Muhedini si dhe kryetarja e forumit të gruas, znj.Vjollca Braho. Në fjalën e etij në këtë takim, kryetari Shpëtim Idrizi tha se PDIU është një forcë e madhe, falë mbështetjes që i kanë dhënë gratë ndër vite.
“PDIU sot ka një prani kaq të madhe të nënave dhe grave, sepse PDIU është parti e kauzave, një parti që vjen nga ndjeshmëria e një padrejtësie të madhe historike, që ne kemi ditur ta kalojnë nga dhimbja, në shpresë. Baza e PDIU-së kanë qënë gratë dhe PDIU nuk mund të mos sillet si parti e madhe me gjithë këto vajza dhe gra që ne kemi. PDIU është nisur dhe do të bëhet një parti e madhe, për shkak të pjesëmarrjes së grave në këtë parti”, tha Idrizi. Aio i bëri thirrje grave dhe të gjithë shqiptarëve që të anëtarsohen në PDIU si një forcë politike që përfaqëson gjtihë shqiptarët.
“Jam shumë komod që ju ftoj juve grave në PDIU, pasi jam i bindur që ne të gjithë bashkë, jemi ballëhapur për kauzat që kemi mbajtur. Ju ftoj juve dhe të gjithë shqiptarët të anëtarësohen në PDIU, sepse ne jemi për bashkim kombëtar, ne jemi që çështja çame të marrë një drejtësi ndërkombëtare, ne jemi që diaspora, pra 35% e shqiptarëve, të kenë një institucion të rëndësishëm ku të adresohen promblematikat e tyre. PDIU është parti e të gjithë shqiptarëve, pasi në këtë parti ka zonja të nderuara nga Tropoja në Konispol”, – theksoi Shpëtim Idrizi.
Kryetarja e grupit parlamentar të PDIU-së, deputetja Mesila Doda vlerësoi pjesëmarrjen e grave në PDIU dhe në poltikën në tërësi si një faktor që sjell paqe e stabilitet për vendin.
“Kur vendosa t’i bashkëngjitesha PDIU-së, kisha parasysh gjithë këto gra që janë anëtare dhe që zëri i tyre dëgjohet. Gratë nuk kanë nevojë për sherrnaja të pafunda, ndaj politika jonë duhet të jetë drejt një paqësimi dhe drejt mbajtjes së kauzave dhe gruaja është mënyrë se si mund të realizohen këto gjëra”, – tha Doda.
Ndërsa deputeti Tahir Muhedini, njokohësisht President Nderi i PDIU-së, theksoi se bashkë me gratë do të çohen para kauzat e PDIU-së.
“Vlerësimi për ju gratë është maksimal. Historia e Çamërisë është e dhimbshme, qindra gra, pleq e burra, nuk i mbijetuan atij genocidi, por kemi edhe gra që sakrifikuan shumë. Ne bashkë me ju do të bëjmë të mundur që PDIU të çojë përpara kauzat e saj. Jemi forcë politike me një program kombëtar”, – tha z.Muhedini.
Kryetarja e Forumit të Gruas,Vjollca Braho, falenderoi të gjitha ato gra dhe vajza që kanë mbështetur PDIU-në, në rrugëtimin e saj. “Ndjehem e emocionuar kur kujtoj vitet kur u krijua PDIU. Sot shikoj gjithë ato vajza e gra që na kanë mbështetur në rrugëtimin tonë. PDIU është një parti që shikon drejt së ardhmes dhe është një parti e të gjithë shqiptarëve. Ju bëj thirrje të gjitha vajzave, grave dhe nënave që të anëtarsohen në PDIU”, – tha znj.Braho në fjalën e saj.
