SHBA ka njoftuar se do të dërgojë një delegacion nga Uashingtoni për të marrë pjesë në bisedimet për paqe për Sirinë në Astana. Në këto bisedime Amerika do të përfaqësohet nga ambasadori amerikan në Kazakistan.
Ambasadori amerikan në Astana, George Krol, është emëruar në atë post nga presidenti Barack Obama në fillim të vitit 2015. Ai më parë ka mbajtur poste diplomatike në Moskë, Shën Petersburg, Kijev, Minsk, Varshavë dhe New Delhi.
Ministri i Jashtëm rus, Sergei Lavrov, ka thënë se Rusia shpreson që administrata e presidentit të ri amerikan, Donald Trump, do të dërgojë ekspertë të Lindjes së Mesme për bisedimet rreth Sirisë, që pritet të fillojnë më 23 janar në Astana të Kazakistanit.
Fuqitë perëndimore për javë të tëra e kanë vënë në pikëpyetje qëllimin e bisedimeve në Astana, duke ngritur shqetësimin se ato mund të ndryshojnë kahun e negociatave për t’i dhënë fund luftës gati gjashtë vjeçare në Siri.
