Ministri i Brendshëm i Serbisë, Nebojsha Stefanoviç i ka dërguar sot letër Sekretarit të Përgjithshëm të Interpolit lidhur me kërkesën për rishqyrtimin dhe rivlerësimin e urdhër-arrestit ndërkombëtar të Ramush Haradinaj nga homologu i tij në Shqipëri, Saimir Tahiri
Në letrën e zbardhur nga “Kurir” Stefanoviç shkruan se kërkesa e ministrit të Brendshëm të Shqipërisë është një ndërhyrje e rëndë dhe e papranueshme për sovranitetin serb.
Më tej Stefanoviç i kërkon Interpolit të rruajë fokusin ligjor dhe të shmangë çështje me konotacion politik.
Ministri Tahiri më herët i ka dërguar një letër Sekretarit të Përgjithshëm të INTERPOLI-it, Jurgen Stock ku shprehet se ky urdhër arrest cënon parimet themelore të drejtësisë penale si dhe të drejtat e njeriut.
Nga ana tjetër, Prokuroria për Krimet e Luftës në Serbi deklaroi se nuk do të heqë dorë nga çështja kundër Ramush Haradinajt. Sipas kësaj prokurorie, Haradinaj ka rrëmbyer, torturuar dhe masakruar civilë serbë në vitet ’98-’99 i dhe akuzohet për 63 vrasje.
Sot gjykata franceze ka liruar me kusht ish-kryeministrin kosovar dhe kreun e AAK-së, Ramush Haradinaj. Sipas vendimit të gjykatës, Haradinaj duhet të paraqitet dy herë në javë tek autoritetet dhe të qëndrojë në territorin francez deri në vendimin përfundimtar.
