Në mbledhjen e samitit të NATO-s që po zhvillohet ditën e sotme, Presidenti Kroacisë, Zoran Milanoviç në fjalën e tij është shprehur se ka propozuar që Kosova të integrohet në Aleancën Veriatlantike, duke shtuar se kështu mund të bëhet shtet i plotë. Ndër të tjera ai është shprehur se në samit është përmendur rajoni dhe rreziqet e mundshme nga destabilizimi si pasojë e pushtimit rus në Ukrainë. Por, ai ka shtuar se nuk është përmendur në këtë mes edhe Serbia e Kosova.
“Katër vendet anëtare të NATO-s ende nuk e kanë njohur Kosovën. Unë propozova që Kosova të integrohet dhe më në fund të bëhet një shtet i plotë. Regjioni është përmendur, Bosnja-Hercegovina si shtet që pretendohet se është i rrezikuar, Moldavia, Gjeorgjia, por Serbia e Kosova nuk u përmendën” – është shprehur Milanoviç.
Ndërkohë kujtojmë se presidentja e Kosovës, Vjosa Osmani ditë më parë i është drejtuar me një letër presidentit të Shteteve të Bashkuara të Amerikës, Joe Biden, ku i ka kërkuar ndihmën e SHBA-së për t’u anëtarësuar në NATO.
Kujtojmë se në samitin e NATO-s po merr pjesë edhe kryeministri Edi Rama, i cili nuk ka mundur të flas aq sa Presidenti kroat.
