Nga Alketa Ipeku
Kam kohë që po të dëgjoj Rudinë, tek flet në parlament e jashtë tij, në studio televizive apo dhe në intervista.
Herë të kam kuptuar e herë jo; herë më ka pëlqyer thelbi i mendimit e herë m’u ka dukur pa lidhje fare.
Unë mund të jem askush për ty, po ti për mua je ligjvënëse. Merr vendime për mua (njeriun e thjeshtë), je zëri im në parlament (duhet të jesh); ti si gjithë zonjat e zotërinjtë atje, paguhesh nga taksat e mia e gjithë atyre si unë.
Jam munduar të kuptoj fjalimet e tua emotive ose jo e përsëri kam pikëpyetje në kokën time të thjeshtë.
Gjithsesi mund të mos shkruaja, po natyra ime s’më lë.
E dëgjova disa herë fjalën tënde sot para gazetarëve dhe sinqerisht u gëzova që nuk “kishe përtuar” të merrje pjesë në mbledhjen e Këshillit Politik, po nuk e kuptova thirrjen tënde drejtuar ndër të tjera nënave, grave e motrave për të të mbështetur ty dhe opozitën parlamentare (dhe pse për mua është e pakuptimtë) për listat e hapura. Çfarë mund të bëjmë ne? Të protestojmë para parlamentit?
Vendimet i merrni ju, që kur po pyetemi ne?!
Nuk të kam dëgjuar të flasësh ndonjëherë për rritjen e kuotës gjinore të grave në Kuvend, as në mbështetje të mësueseve, kur janë fyer (me sa të kam ndjekur unë, qofsha e gabuar), po vetëm për reformën zgjedhore. Për këtë as flas e as të pyes dot se nuk jam specialiste në këtë fushë.
Megjithatë, jam totalisht kundër kandidatëve në lista që vijnë si rrjedhë e emrit të prindërve (s’e kam vetëm për ty këtë), pa kontribute personale në shoqëri, komunitet apo në partitë që i kandidojnë.
Flet gjithnjë në shumës Rudinë: “shqiptarët, demokratët më kanë mbështetur” e plot të tjera, por s’të kam parë të zhvillosh ndonjë takim të hapur (se jemi në kohë pandemie) për të diskutuar rreth çështjeve për të cilat flet.
Nuk më interesojnë listat e hapura apo të mbyllura, sepse njëlloj do fitojnë ata, të cilët ia kanë vënë synim vetes, por dua që vota ime mos të shkojë dëm.
Dua që vota ime, të ketë zë në parlament, që fëmija im mos të dojë të largohet nga ky vend, që taksat e mia mos të shërbejnë për t’u paguar njerëz që vijnë nga hiçi e dalin flasin për “kërpërata” , sjellje “xhentëllmenësh”, apo të ngatërrojnë Pashko Vasën me Fishtën e shumë të tjera nga këto.
Ka shumë Rudinë që unë vërtetë dua të të besoj, po s’më mbushin mendjen prurjet me katapultë e me rrugë shtruar me dafina në politikë, se nuk marr guximin të flas për arritje profesionale.
Të lutem Rudinë, mos përto të flasësh më shumë në mbështetje të gruas, profesioneve që ajo bën, siç po bën për reformën zgjedhore…
Një pyetje të fundit kam: A do ishe sot në parlament, nëse s’do kishe mbiemrin e nderuar që mban??
Unë them jo, pasi Shqipëria ka shumë djem e vajza të shkolluar brenda e jashtë vendit, po jo çdokush kish fatin tënd.
Dua të të besoj Rudinë po e kam të vështirë e ndoshta të pamundur që gjithë këtë furtunë po e bën për popullin, se shumë flitet në emër të tij.
(Asgjë personale, thjesht një reflektim personal e jo vetëm).
