Rudina Hajdari bëhet zyrtarisht deputetja e dytë nga Partia Demokratike që refuzon dhënien e mandatit pas Myslim Murrizit.
Vajza e ish-liderit të Dhjetorit, Azem Hajdari, ka zgjedhur Zërin e Amerikës për të bërë publik qëndrimin e saj për qëndrimin në Kuvend.
Rudina Hajdari: Unë mendoj se parlamenti i jep oksigjen demokracisë në vend, i jep oksigjen partive politike. Është vendi ku ne përfaqësojmë sovranin prandaj duke marrë parasysh që kjo është një përgjegjshmëri shumë e lartë që ndjej mbi shpatulla mendoj se qëndrimi në parlament do të ishte vendimi më i duhur.
Ajo tha se me këtë vendim, refuzoi të zgjedhë rrugën më të lehtë për të siguruar karrierën e saj politike dhe zgjodhi rrugën që ka të bëjë me të ardhmen e Shqipërisë.
Rudina Hajdari: Shqipëria është në një udhëkryq dhe nuk po shikojmë zgjidhje as majtas dhe as djathtas. Nga ana tjetër të gjithë jemi të gjendje të shikojmë se ku është e ardhmja por e kaluara është mbi supet dhe zemrat tona.
Edhe pse e kaloi për një kohë të gjatë në heshtje, vendimi i saj ishte i pritshëm nga subjekti i saj politik.
Eksponentë të Partisë Demokratike kanë paralajmëruar se ndaj saj do të mbahet i njëjti qëndrim si me Murrizin për shkeljen e vendimit politik, megjithatë mbetet të pritet se çfarë do të vendosë Kryesia e kësaj partie.
Vlen të theksohet se vendimi i Hajdarit për të mbajtur mandatin duket të jetë terësisht personal, pasi në protestën e fundit të opozitës vëllai i saj Kiri Hajdari u pa përkrah Lulzim Bashës në protestë, madje iu drejtuar dhe protestuesve me një fjalim.
