Banorët e gjashtë fshatrave të Njësisë Administrative Tërthore, të bashkisë së Kukësit, të cilat ndahen nga rreth 17 kilometra autostradë, janë tërësisht të rrezikuar në çdo moment
Mungesa e mbi apo nënkalimeve u vështirëson jetën, pasi ata duhet patjetër që të hyjnë apo dalin nga fshatrat e tyre, duke kaluar trafikndarësen e autostradës nga njëra anë në tjetrën.
Por jo vetëm kaq, por atyre iu duhet të mbajnë në shpinë edhe të afërmit e tyre që ndërrojnë jetë, për ti çuar në varrezat e fshatit, duke kaluar mes për mes autostradës, e cila nuk iu mundëson një kalim normal siç në fakt duhet të ndodhte.
Fotoja që shihni, është marë në një ceremoni mortore në fshatin Gjegjën të kësaj Njësie Administrative, ku shihet mjaft qartë kortezhi mortor, të cilit i duhet të kalojë mes për mes autostradës, bashkë me trupin e pajetë të të afërmit, për t’a përcjellë atë për në banesën e fundit.
Caktohen tre djemtë më të shkathët të fisit, të cilët duhet të bëjnë rolin e policit rrugor, për të ndaluar qarkullimin e automjeteve, në mënyrë që kortezhi të kalojë dhe bashkë me të edhe i ndjeri apo e ndjera e radhës që ka ndërruar jetë.
Ky “ritual” tashmë është bërë i zakonshëm, por banorët duket se nuk ndalen në kërkesat e tyre, ku i kërkojnë shtetit që të ndërtojë mbi e nënkalimet e kërkuara prej vitesh, në mënyrë që edhe të vdekurit të përcillen për në banesën e fundit siç duhet.
“Ça t’iu them. Është turp e faqja e zezë që sot në vitin 2018 ne marrim trupin e pajetë të të afërmve tanë dhe t’i kalojnë nga trafikndarësja, mes për mes ausotradës dhe më pas i varrosim. Turp, shtetit i kemi kërkuar që të ndërtojë mbi e nënkalimet, por kot. Dhe pastaj duan tarifë të rrugës së Kombit” thotë një nga banorët që mori pjesë në këtë ceremoni mortore.
Ndërsa një tjetër thotë, se që prej vitit 2008 janë bërë kërkesat për të ndërtuar këto mbikalime, por e kotë.
“Që kur u ndërtua rruga iu kërkuam ndërtimin e mbikalimeve. Por nuk na dëgjoi njeri. Shikoje si ne, prej gati 10 vitesh e kalojmë kortezhin mortor në këtë mënyrë, që nuk e ka parë historia në ndonjë vend tjetër. Si mundet të kalojë trupi i pajetë i një njeriu mes për mes autostradës, duke e mbajtur në shpinë për ta varrosur? Turp për këtë shtet dhe për atë tjetrin që e ndërtoi rrugën dhe na la ne për faqe të zezë” thotë ky banor tjetër.
Por si është ndërtuar segmenti rrugor Kukës-Morin, pjesë e autostradës Duurës-Kukës?
Traseja e rrugës së Kombit kalon mes përmes fshatrave, duke ndarë edhe kullotat, ujërat, tokat, varrezat, çdo gjë. Mungesa e mbikalimeve, por edhe sinjalistikave të domosdoshme të rrugës ka sjellë jo pak, por më shumë se 10 të vdekur e mbi 70 të plagosur.
Sipas banorëve, shumica e viktimave të shënuara në këtë segment rrugor janë banorë të kësaj Njësie Administrative, të cilët janë aksidentuar teksa kalonin rrugën.
Por nuk kanë munguar edhe fëmijët, të cilët teksa shkonin në shkollë janë aksidentuar nga automjetet që ecin me shpejtësi shumë të lartë, madje pranë godinës së shkollës së fshatit Morin është vënë edhe një lapidar për ngjarje të tilla.
Pushteti vendor në Kukës dhe banorët e kanë bërë problem në instancat qendrore shqetësimin, por sipas tyre askush nuk është marrë me zgjidhjen e tij.
Aktualisht, rruga ka edhe mungesa të sinjalistikës, mospërfundim të punimeve që e bëjnë rrugën me katër korsi, shpesh herë ka rrëshqitje dherash, në trase dalin kafshë të ndryshme etj.
Ekspertët e fushës, nga një konstatim i bërë, thonë se nga Pika e Kalimit Kufitar në Morinë deri në qytetin e Kukësit numërohen plot 32 ndërprerje të trafikndarëseve, që janë burim i vazhdueshëm aksidentesh.
Paradoksalisht, për banorët e zonës pritet që të aplikohet edhe tarifa e rrugës së Kombit, ku banorëve do u duhet të paguajnë për të kaluar në këtë rrugë.
Por, banorët janë të vendosur që të mos e paguajnë tarifën që pritet të vendoset nga shteti, pasi thonë, se ajo është e padrejtë sakohë që vetë shteti nuk ka plotësuar kriteret e duhura jo vetëm për këtë rrugë, por edhe një tjetër alternative që duhet të ishte, siç ndodh në çdo vend të botës.
Qeveria ende nuk ka bërë publik vendimin për vlerën e tarifës që duhet të paguajnë kuksianët, për të kaluar në këtë rrugë, por ajo pritet që të jetë 100 lekë të reja. Ndërsa për përshkuesit e tjerë, tarifa nuk pritet të ndryshojë.
https://ekonomix.al/rruga-e-kombit-pa-mbikalime-per-varrime-kortezhi-kalon-mes-autostrades/
