Qeveria e Kosovës edhe për vitin 2017 nuk është duke planifikuar vendosjen e taksës për shfrytëzimin e autostradës “Ibrahim Rugova”, nga fshati Gjurgjicë deri në pikën kufitare në Morinë.
Këtë ka pohuar Ministri i Infrastrukturës së Kosovës, Lutfi Zharku, gjatë një interviste për gazetën “Zëri”.
“Së paku deri në fund të vitit 2017 nuk po planifikohet të vendoset ndonjë taksë për shfrytëzimin e autostradës. Ta them të drejtën aktualisht nga Gjurgjica e deri në Morinë janë 60 kilometra autostradë, dhe, edhe sikur tani të shpallim një tender, unë besoj se nuk do të kemi ndonjë ofertë serioze. Kështu që po presim edhe pak”, tha ministri Zharku.
Ai pohoi më tej se përgatitjet për konçesionimin e autostradës, Qeveria e Kosovës, do t’i fillojë gjatë vitit që vjen dhe se gjatë vitit 2018 do të përfundojë edhe ndërtimi i autostradës që lidh Kosovën me Maqedoninë.
“Kur të kryhet edhe autostrada e dytë atëherë po besoj se do të kemi më shumë interesim”, ka thënë më tej ministri Zharku. Ai thotë se Qeveria e Kosovës po ashtu është duke pritur edhe përfundimin e procesit për koncesionimin e autostradës në territorin e Shqipërisë. “Po presim ta shohim se si po funksionon në atë anë, pasi që deri tani, atyre, procesi për këtë qëllim, iu ka dështuar dy herë”, shtoi ministri Zharku.
