Bilanci i viktimave të shkaktuara nga tërmeti që goditi Turqinë vijon të rritet. Deri më tani raportohet se ka shkuar në 38 numri i të vdekurve ndërsa mbi 1607 janë nxjerrë të plagosur nga rrënojat.
Ndërkohë autoritetet turke vazhdojnë kërkimet nën rrënoja, duke shpëtuar mbi 45 persona. Më shumë se 72 ndërtesa janë të rrënuara plotësisht, 514 të tjera të dëmtuara rëndë dhe 409 me dëmtime të vogla.
Që prej tërmetit famkeq të 24 janarit me magnitudë 6.8 ballë të shkallës richter, Agjencia e Menaxhimit të Emergjencave dhe Fatkeqësive njofton se janë regjistruar 462 paslëkundje, 14 prej të cilëve me magnitudë mbi 4.
Qyteti më i dëmtuar ka qenë Elazig, ku tërmeti kishte epiqendrën. Autoritetet e Emergjencave kanë bërë të ditur se janë instaluar 8565 tenda për strehimin e të gjithë personave që kanë mbetur në rrugë.
Ky ishte tërmeti më i fuqishëm pas atij të vitit 1999, ku 17 mijë persona humbën jetën.
