Famullitari Dom Kelmend Spaqi, i cili gjatë luftës në Kosovë në vitet 1998 – 99 po kryente detyrën e meshtarit në fshatin Gllogjan, një zonë në afërsi të kufirit me Serbinë, në një libër të shkruar nga vetë ai, ka rrëfyer momentet e hidhura të luftës.
Prifti katolik ka treguar se ushtria famëkeqe serbe kishte mbërritur në fshat dhe ai detyrohej që të gjithë fshatarët t’i merrte brenda në kishë për t’i mbrojtur nga vrasjet dhe përdhunimet. Madje, Dom Spaqi rrëfen se disa herë serbët kishin tentuar të futeshin brenda në kishë për t’i vrarë të gjithë, por prifti kishte kërkuar që fillimisht të vritet ai dhe murgeshat e më pas fshatarët.
Një nga momentet më kulminante të rrëfimit të tij, është edhe muaji i Ramazanit për besimtarët myslimanë. Duke qenë se xhamitë ishin shkatërruar dhe besimtarët nuk kishin se si të informohen për Iftarin apo Syfyrin (momentet kur agjëruesit kanë orarin për të ngrënë) prifti kishte urdhëruar që të binin këmbanat. Më poshtë është edhe një pjesë e shkrimit të tij.
