Versioni i Idrizit për debatin rreth timonit: Shoferit i duhen bërë vazhdimisht kontrollet shëndetësore për të vërtetuar mbajtjen e timonit
Ka zgjedhur batutën e famshme të gruas nga Berati e cila 15 vite më parë u bënte thirrje dëshpëruese krerëve të PS-së së asaj kohe Nano dhe Meta, që të mos ziheshin, për ta përshtatur me sherrin e gjatë Basha-Rama.
“Aman nuk duam as bukë as ujë, veç ta zgjidhin krizën politike”, ka thënë me humor Idrizi kur po rrëfente natën e marrëveshjes Rama-Basha. Ishte pjesë e tryezës poltike të thirrrur nga partitë e vogla për zgjidhjen e krizës, kur Basha refuzonte të hynte në zgjedhje.
Shoferit i duhen bërë vazhdimisht kontrollet shëndetësore për të vërtetuar mbajtjen e timonit. Bëmë gjithçka që ata të gjenin një zgjidhje. Ne kërkuam që në fillim që ne të hynim të vetëm në zgjedhje. Ishim për një sistem proporcional kombëtar. Ka një model të gabuar në Shqipëri, jo proporcional për numrin e votave për një mandat. Ndaj për shkak të sistemit ka ca vota që humbin. Pati një sërë përpjekjesh për zgjidhjen e krizës. U bënë disa propozime. U bënë ca paketa. Pastaj me vonë doli ajo “BigMac”, e pastaj ato të kulinarisë me tepsitë. Por Rama më në fund kërkoi takim me Bashën. E mua mu kujtua ajo e Beratit dhe kam thënë “aman nuk duam as bukë as ujë, veç ta zgjidhin”, u shpreh Idrizi në një rrëfim në studion e “Vila24” në rubrikën “Këndi i ekselencës”.
Kreu i PDIU-së u shpreh që kjo marrëveshje kishte një anë të mirë, që do të futen në zgjedhje të gjitha palët dhe një të keqe, punën e koalicioneve.
“Dhe aty doli pastaj, një lajm i mirë, një lajm i keq. Lajmi i mirë ishte që shqiptarët do të hyjnë në zgjedhje të gjithë palët, dhe duket situatë e mirë. Por jemi dyshues për faktin se çfarë do të bëhet me standardet zgjedhore. Dhe me këtë marrëveshje hoqën me vendim partie dhe jo qeverie, këtë punën e koalicioneve“, tha Idrizi.
Idrizi rrëfen se ishte 21 vjeç në kohën kur u angazhua në lëvizjet e të rinjve në vitet ’90.
Ai kujton parullën “E duam Shqipërinë si gjithë Europa”, dhe tregon se në atë kohë të rinjtë kujtonin se Shqipëria do bëhej pjesë e saj brenda pak muajve. Por tani shton Idrizi, “po shohim se integrimi Europian, kërkon shumë punë dhe angazhim”.
“Kam qenë 21 vjeç kur u angazhova në lëvizjen e dhjetorit. Unë nuk e dija në atë kohë që do merresha me politikë. Madje as idenë e partive të lira politike nuk e kishim të qartë në atë kohë. Unë studioja për Ekonomi, dhe ngadalë ndodhi përfshirja ime në politikë”, u shpreh Idrizi.
Idrizi është shprehur se ia ka ndaluar fëmijëve të tij të merren me politikë.
“Tim biri i kam ndaluar të merret me sport dhe politikë. E para me sport, se kur kujtoj se që nga nga 10 deri 18 vjeç nuk kam lënë baltë të fushave të sportit pa provuar, i them të jetë ndryshe. Por edhe me politike i kam këshilluar të mos merret. Fëmijët e mi i kam orientuar drejt profesioneve”, tha Idrizi.
