Argjinaret duken të ndërlikuar për t’u gatuar por nëse arrini të kapërceni fazën e pastrimit, pjesa tjetër do të bëhet kollaj. Linda Fishta, në këtë recetë Conad, do t’ua bëj, me siguri, punën më të thjeshtë. Fotografia Armand Habazaj.
Për 4 persona:
320g oriz Carnaroli • 5 angjinare të freskëta ose të ngrira • lëng zarzavatesh i valuar, afërsisht 1 litër • 1 qepë e vogël jo djegëse • 1 limon • gjalpë, sa një kokërr arre • vaj ulliri, majdanoz, kripë, piper • Krem me Parmigiano Reggiano • 150-200g Parmigiano Reggiano I grirë • 120g pana • gjalpë, sa një kokërr arre
Përgatitja:
1.Në rastin kur kemi angjinare të freskëta: pastrojmë angjinaret duke i hequr fletët e jashtme deri sa të arrijmë tek ato në qendër që janë me ngjyrë më të hapur dhe të njoma. I ndajmë në mes, pastrojmë pushin që mund të kenë në mes dhe pasi i presim në feta të holla, i vëmë në një tas me ujë të ftohtë me limon që të mos nxihen. Në rastin kur përdorim angjinare të ngrira, mjafton t’i lëmë të shkrihen në temperaturë ambienti.
2.Në një tenxhere, skuqim qepën me 3 lugë vaj ulliri dhe kur të ketë marrë pak ngjyrë shtojmë angjinaret të kulluara dhe të thara më parë me letër. I skuqim për pak minuta në flakë të lartë, I kriposim dhe më pas shtojmë pak lëng të valuar. I lëmë në zjarr derisa të kenë thithur të gjithë lëngun (afërsisht 5 minuta).
3.Shtojmë orizin, e skuqim për pak minuta, e lagim me lëng zarzavatesh herë pas here sipas nevojës (kur të ketë thithur lëngun që kemi hedhur më parë, shtojmë lëng tjetër). Vazhdojmë derisa të jetë zier plotësisht.
4.Kur orizi të jetë zier, e rregullojmë për piper, shtojmë disa gjethe majdanoz të freskët, fikim zjarrin, shtojmë gjalpë sa një kokërr arre dhe e përziejmë orizin me lugë druri me kujdes. E mbulojmë me kapak dhe e lëmë të pushojë për 2 minuta që t’I japim kohë aromave të përzien me njëra-tjetrën.
Për kremin me Parmigiano: ngrohim panën në një tenxhere të vogël me flakë të ulët, shtojmë gjalpin, Parmigianon. I përziejmë me shpejtësi me rrahësin e vezëve me dorë, derisa të përftojmë një krem të trashë. Gjithë ky veprim, duhet të zgjasë vetëm pak minuta. E shërbejmë rizoton duke i hedhur
sipër kremin me Parmigiano.
