Në deklaratën për mediat, ish-kryeministri Sali Berisha akuzoi kryeministrin Edi Rama se nuk i merr parasysh kërkesat dhe sugjerimet e PD për t’i ardhur në ndihmë qytetarëve sepse “vesi” i tij tha se është “vjedhja”. Berisha paralajmëroi për protesta të tjera ku tha se “qytetarët shqiptarë me revoltën e tyre të ardhshme do të vendosin për këto kërkesa”.
“Unë jam i vetëdijshëm se Edi Rama me arrogancën e tij dhe vesin e tmerrshëm të vjedhjes dhe pasurimit duke vjedhur fondet dhe pasuritë publike nuk merr dhe nuk do marrë parasysh këto kërkesa, por unë e garantoj se qytetarët shqiptarë me revoltën e tyre të ardhshme do të vendosin për këto kërkesa dhe kërkesa të tjera të programit të emergjencës të PD, si është indeksimi i cmimeve dhe masa të tjera shumë të rëndësishme”, u shpreh Berisha.
Berisha ka kërkuar që Qeveria të marrë masa dhe të përgjysmojë menjëherë taksimin e naftës në vend. Sipas tij, qeveria të zhdoganojë naftën që kalon jashtë sistemit doganor në Shqipëri.
Nuk ka asnjë mundësi që nafta të jetë kontrabandë, veçse kur patronohet nga dora e zezë e qeverisë.
“PD kërkon përgjysmimin e menjëhershëm të taksimit të naftës, që me vlerën 1.1 euro ëhtë më i larti në botë. Ai është shndërruar në faktor kryesor të çmimit stratosferik të kësaj lënde djegëse në Shqipëri.
Përgjysmimi i kësaj barre fiskale, do të shoqërohej me një ulje korresponduese po kaq të rëndësishme të çmimit të naftës. Ata që mendojnë se arka do boshatiset, kjo nuk është e vërtetë. Mjafton që qeveria të zhdoganojë rreth 250 mijë tonë naftë që kalon jashtë sistemit doganor në Shqipëri. Nuk ka asnjë mundësi që nafta të jetë kontrabandë, veçse kur patronohet nga dora e zezë e qeverisë” – tha Berisha.
