Opozita ka ndjekur të njëjtën rrugë si me ligjin për rivlerësimin kalimtar të gjyqtarëve dhe prokurorëve, duke mos marrë pjesë në votim edhe për ligjin për organizimin e prokurorisë raporton ora news.
Janë 6 çështje thelbësore që ekspertët demokratë propozuan për ligjin që sipas tyre nuk u morën parasysh nga maxhoranca.
Nënkryetari i Komisionit të Reformës të drejtësisë, Oerd Bylykbashi foli për përkeqësim të ligjit për prokurorinë.
Bylykbashi: Ligji shkon dhe përkeqëson rolin e Prokurorit të Përgjjithshëm, duke dobësuar dhe çuar gravitetin tek drejtuesit e Prokurorive të rretheve, gjë që nuk është parashikuar nga Kushtetuta.
Maxhoranca e miratoi e vetme ligjin në terësi, ndërsa relatori Ulsi Manja e vlerësoi se tashmë ligji për prokurorinë është i mbyllur.
Manja: U pranuan dhe u vlerësuan sugjerimet dhe vërejtjet e disa kolegëve anëtarë të Komisionit të reformës në drejtësi dhe mund të themi që ligji për organizimin e dhe funksionimin e Prokurorisë tashmë konsiderohet i mbyllur.
Të hënën pritet që ky ligj të votohet edhe nen për nen.
Por cilat jan pikat që ndajnë mazhorancën dhe opozitën për prokurorinë?
Ekspertët demokratë në opinionin e tyre konstatojnë se ligji i ri tkurr ndjeshëm kompetencat e Prokurorit të Përgjithshëm, duke e shndërruar vetëm në një funksion që mbledh statistika, i paaftë të ndikojë në rritjen e performancës së prokurorisë si sistem.
E drejta e kontrollit për korrektësinë e zbatimit të udhëzimeve të tij, sipas demokratëve nuk i nihet Kryeprokurorit, por Inspektorit të Lartë të Drejtësisë.
Gjithashtu demokratët nuk bien dakort mbi rregullat e organizimit të brendshëm të organit të prokurorisë.
Në opinion ata vlerësojnë se kanë marrë peshë specifike dhe vendimmarrëse më të madhe drejtuesit e prokurorive të rretheve, ndaj sipas tyre një parashikim i tillë ka potencial të lartë rreziku për të dizintegruar prokurorinë, në “ishuj” të pavarur pushteti brenda prokurorisë.
Demokratët në Komisionin e Posaçëm Parlamentar për reformën në drejtësi, kërkuan dhe rishikimin e kritereve të emërimit të Prokurorit të Përgjithshëm.
