Kryetari i Kuvendit Ilir Meta pret në takim ambasadorin amrikan Donald Lu dhe atë të BE-së, Romana Vllahutin
Të gjitha mosmarrëveshjet për Reformën në Drejtësi mes mazhorancës dhe opozitës do të zgjidhen nga EURALIUS dhe OPDAT, misioni i SHBA-së dhe i BE-së për drejtësinë në Shqipëri. Lajmi vjen nga takimi mes kryetarit të Kuvendit Ilir Meta me ambasadorin e SHBA-së Donald Lu dhe atë të BE-së Romana Vllahutin.
Takimi është zhvilluar në kryesinë e Kuvendit dhe ka zgjatur rreth një orë. Përmes një njoftimi për mediat, Kuvendi sqaron: “Kryetari i Kuvendit shprehu mbështetjen e tij maksimale dhe konkrete për përmbylljen me sukses të procesit të ndryshimeve kushtetuese, mbështetur mbi bazën solide dhe profesionale të rekomandimeve përfundimtare të Komisionit të Venecias. Meta shprehu vlerësimin e tij për punën e madhe të kryer nga grupi i ekspertëve dhe veçanërisht asistencën dhe kontributin e çmuar të misioneve të EURALIUS-it dhe OPDAT-it, për t’u dhënë zgjidhje të gjitha çështjeve dhe komenteve të palëve të përfshira në këtë proces.
Sakaq, z. Meta theksoi se kjo punë voluminoze ka krijuar shtratin dhe është tashmë një bazë solide për konsensus, sepse të gjitha palët kanë rënë dakord dhe kanë shprehur pranimin e rekomandimeve të Komisionit të Venecias.
Kryetari i Kuvendit vuri gjithashtu në dukje se është e domosdoshme që të gjitha palët të kenë një lexim racional dhe objektiv ndaj opinionit përfundimtar të Komisionit të Venecias. Ai theksoi se për të gjitha çështjet që palët ndajnë qëndrime të ndryshme, duhet t’i adresohen ekspertëve të EURALIS-it dhe OPDAT-it, opinioni i të cilëve duhet të shërbejë si bazë për konsensusin përfundimtar dhe miratimin sa më parë të kësaj reforme madhore për vendin dhe qytetarët shqiptarë”, theksohet në sqarimin e Kuvendit.
