Është koha për të vendosur më 21 korrik
Ambasadori i SHBA-së Donald Lu ka takuar mëngjesin e sotëm kryetarin e komisionit të posaçëm për reformën në drejtësi Fatmir Xhafën. Takimi po mbahet në kryesinë e Kuvendit.
Një ditë më parë, në websajtin e Ambasadës Amerikane, Donald Lu përmes një mesazhi me titull “Një thirrje për brezin e ri të Shqipërisë”, tregoi zhgënjimin e tij nga politika, ndërsa shprehej mjaft kritik ndaj liderit të Opozitës Lulzim Basha.
Ambasadori Amerikan deklaroi se që prej 4 majit të shkuar, Shtetet e Bashkuara dhe Bashkimi Europian i kishin ofruar shumicës dhe opozitës në Shqipëri tre zgjidhje kompromisi”, për të kapërcyer ngërçin që mban të bllokuar reformën në Drejtësi.
“Mazhoranca i ka pranuar këto propozime. Zoti Basha ka gjetur gjithmonë diçka për të refuzuar”, shkruante ambasadori Lu në një thirrje drejtuar të rinjve shqiptarë.
Ai u bënte thirrje anëtarëve individualë të Kuvendit që të marrin përgjegjësinë për të votuar në favor të kësaj reforme. Votimi është planifikuar për datën 21 korrik. “Është koha për të vendosur”.
