“I bëj një thirrje mazhorancës mos të kapet pas alibive dhe fijeve të kashtës, ka detyrim për zbatimin e plotë dhe total të rekomandimit 88”
Delegacioni gjerman ishte i qartë në sygjerimin ndaj opozitës që të votojnë më 21 korrik reformën në drejtësi. Në takimin e sotëm me opozitën deputeti gjerman, Gunther Krichbaum, kishte kërkuar nga Basha miratimin e reformës në drejtësi më 21 korrik. Megjithatë Basha tha sërish Jo. Ai ka përsëritur qëndrimin e tij të palëkundur kundër kësaj reforme pavarësisht sinjaleve të qarta të gjithë faktorit ndërkombëtar ndaj opozitës që ta votojë këtë reformë. Pas takimit me delegacionin gjerman, Basha tha se PD është e gatshme të angazhohet në çdo çast për tu dhënë shqiptarëve drejtësinë e pakapur politikisht, që sipas tij është e vetmja drejtësi e reformuar.
“Sot i bëj një thirrje kundërshtarëve tanë politikë duke u bërë fare të qartë se opozita nuk është tërhequr, nuk tërhiqet dhe nuk ka ndërmend të tërhiqet nga zbatimi i plotë i rekomandimit 88 të Komisionit të Venecias që të ndalim luftën verbale, të ndalim insinuatat, ti japim shqiptarëve një qartësi që e meriton. Unë, PD dhe opozita jemi për zbatimin e plotë të rekomandimit 88. Nëse dhe zoti Rama është për zbatimin e plotë të rekomandimit të 88 të Venecias jemi gati tu japim shqiptarëve dhe të ulemi të gjejmë përmes instrumentave që ekzistojnë, Komisioni ad-hoc apo instrumentat e tjerë, ti gjejmë zgjidhjen përfundimtare këtij problemi. Shqiptarët nuk meritojnë akuza, nuk meritojnë provokime, nuk meritojnë ikje nga detyrimi që ka gdhendur opinioni i Venecias si për mazhorancën, si për opozitën. Por në veçanti për mazhorancën që ka përgjegjësinë për këtë reformë duke qenë në mazhorancë. Në vend ti ikim rekomandimit 88, i bëj një thirrje dhe ftesë mazhorancës mos të kapet pas alibive dhe fijeve të kashtës, asgjë nuk e zbeh dhe nuk e tejtërson detyrimin që ka për zbatimin e plotë dhe total të rekomandimit 88. Unë dhe PD jemi të gatshëm të angazhohemi në çdo çast për t’u dhënë shqiptarëve drejtësinë e pakapur politikisht që është e vetmja drejtësi e reformuar.”
