Presidenti i Turqisë Rexhep Taip Erdogan ia ka dalë mbanë në përpjekjen e tij për ndryshimet themelore kushtetuese, duke e transformuar vendin në republikë presidenciale. Megjithëse ende duhen ditë që të dalin rezultatet zyrtare deri më tani mësohet se në referendumin për ndryshimet kushtetuese 51.41% e qytetarëve e kanë mbështetur Presidentin Erdogan. Këtë votim kreu i shtetit të Turqisë e cilësoi historik.
Fitorja e Erdogan u prit në të gjithë Turqinë me festime të mëdha. Tre qytetet më të mëdha të vendit, Stambolli, Ankaraja dhe Izmiri, i thanë “Jo” ndryshimeve kushtetuese. Mbështetësit e opozitës dolën menjëherë në rrugët e Stambollit duke përplasur tenxhere e tiganë, një formë tradicionale proteste kjo.
