Pas sulmit të dytë që iu bë automjetit së analistit Fatos Lubonja, ka reaguar ish-deputeti i PD-së, Genc Pollo.
Pollo nëpërmjet një postimi në faqen e tij të Facebook është shprehur se ky është një sinjal për t’i mbyllur gojën.
“Fatos Lubonja me jetën e tij të vështirë është simbol për shumëçka. Por vitet e fundit ai është ndër pak kryezërat jopartiakë e të besueshëm që denoncojnë parreshtur kapjen e shtetit dhe ofiqarët banditë. Prandaj sulmi i përsëritur kundër tij, duke i shkatërruar sërish veturën, është vetëm një sinjal i përsëritur për t’i mbyllur gojën. Agresioni verbal i qeverisë Rama kundër çdo kritiku dhe ligjet anti fjalë kanë krijuar rrethanat inkurajuese për keto agresione.
Prokuroria duhet të hetojë seriozisht e të nxjerrë para drejtësisë edhe dorësin edhe mandantin. Por gjithkush mund të mbrojë Fatos Lubonjën duke thënë zëlartë si ai të vërtetat e kohës”, është shprehur Pollo.
Kujtojmë se sulmi ndaj makinës së Lubonjës është bërë natën e ndërrimit të viteve ndërsa ende nuk janë identifikuar autorët.
