Në një takim diskutues me studentë të Magjistratutës, gjatë pasdites së kësaj të premteje, Kryeministri i vendit, Edi Rama ka folur gjerësisht mbi reformën në drejtësi, për nevojën urgjente të miratimit të saj dhe i ka dhënë të drejtë ambasadorit amerikan në Tiranë Donald Lu, duke u shprehur se është i gatshëm për t’u takuar me kreun demokrat Lulzim Basha në çdo orë të ditës dhe të natës.
Rama: “ Ne nuk kemi një formulë që qetëson lepurin e frikës që fle në barkun e opozitës. Opozitës i kam thënë përmes një propozimi që ndoshta e gjejmë, ne jemi gati dhe nuk e kemi ne lepurin që u shkakton atyre një tension të brendshëm, por mbase nga përgjegjësia e madhe që ka opozita për reformën gjendet një zgjidhje. Ne thjesht presim miratimin e SHBA-ve dhe BE-së për një propozim të përbashkët, sepse këtu te ne janë bërë reforma drejtësie që kanë pasur vetëm emrin të tillë, por ja ku jemi me këtë drejtësi si sot. Unë e mirëkuptoj shumë mirë deklaratën e ambasadorit Lu mbi këtë moment të pakuptueshëm dhe tepër absurd. Sot mora një telefonatë nga Holanda, duke më thënë që e kam në tryezë propozimin. Unë e marr atë pa problem, por a e pranojnë SHBA-të dhe BE-ja propozimin e Bashës?”.
Dëgjova Ambasadorin Lu dhe i jap plotësisht të drejtë. I jap plotësisht të drejtë Ambasadorit, jemi në një situatë absurde. Gati të takohem me Bashën në çdo orë edhe natën. Gati të takohem çdo orë, por të kenë propozim të pranueshëm.
Sot nga Holanda erdhi mesazhi i opozitës që propozimin e ke në tavolinë. Unë e marrë por siç e dëgjuat nga ambasadori nuk pranohet nga Shtetet e Bashkuara. Dhe nga Bashkimi Evropian jo e jo! Pasi qëndrimet janë të njësuara.
