Kryeministri Edi Rama ka vendosur t’i “tërheqë veshin” qytetarëve që i lënë komente negative në faqen e tij zyrtare në rrjetet sociale, dhe që mesa duket në një farë mënyre i kanë shpëtuar “përjashtimit nga faqja”.
Rama thotë se shqiptarët nuk duhet të flasin “dokrra” pasi qeveria ka arritur rezultate tepër pozitive në luftën kundër pandemisë së koronavirusit. Më tej kreu i qeverisë i paralajmëron ata komentues “të mos luajnë me zjarrin, se do të digjen vetë”, duke nënkuptuar këtu “Covid-19”.
Pjesë nga deklarata e Ramës:
Miq, ju e dini që unë ju ndjek, ju lexoj dhe jam këtu me vëmendje, sidomos në këtë kohë kaq të vështirë. Lexoj shqetësime reale dhe jo pak dokra, sharje, mallkime që burojnë nga padituria e thellë. Nuk kam asgjë personale me to, se e kam ditur që fyerjet dhe akuzat personale do të shtohen, se e tillë është kjo luftë, dhe ju kam thënë më bini mua por mos luani me zjarrin se mund t’ju djegë ju dhe më të dashurit tuaj dhe vetë Shqipërinë, siç dogji dhe po djeg nga ato vende më të forta se ne.
Është shqetësuese që flitet pa lidhje, deri në pikën që duket sikur flitet nga Hëna. E keni me mua s’ka asnjë problem, vazhdoni, por a ka mundësi të më thoni ku lidhen ato që thoni me rezultatet që kemi arritur deri këtu.
