Teksa ndodhet në Vlorë, kryeministri Edi Rama foli për një proces të vështirë mësimor gjatë këtij viti, për shkak të pandemisë.
Sipas Ramës me hapjen e shkollave do të kemi edhe rritjen e rasteve me të infektuar, megjithatë, thekson se ndarja fizike e nxënësve me shkollën nuk mund të vazhdonte më.
Gjithashtu Rama u bëri apel mësuesve, që të punojnë me nxënësit, për t’i orientuar ata drejt respektimit të masave.
“Na është dashur ta marrim këtë vendim të vështirë. Të gjitha shtete po e marrin. Është i vështirë sepse edhe pse thuhet dhe faktet thonë që fëmijët janë më pak të rrezikuar, nuk është e vërtetë për të gjithë. E dyta, fëmijët vetë mund të jenë më pak të rrezikuar, por janë transmetues.
Siç ka ndodhur në vende të tjera, do kemi prapë rritje të numrave. Por kostoja psikologjike e mos hapjes së shkollave është shumë e madhe. Dhe pasojat që mund të lerë janë shumë të mëdha. Midis të dyjave, në këtë zgjedhje rolin e posaçëm keni për të qenë sa më strikt.
Të jesh strikt, por i duruar. Nuk bëhet kjo me britma dhe rreshtore. Hajde shpjegoja Zahos pse nuk duhet të takohesh me shokun. Nga ana tjetër është shumë e rëndësishme për të punuar me prindërit. Duhet futur gjithë bota e fëmijëve në një kornizë. Është e nevojshme tu thuhet se është e përkohshme. Është një sfidë e madhe dhe e keni këtë barrë. Mësuesit duhet të punojnë shumë që të jenë të vetëdijshëm”, deklaroi Rama.
