Kryeministri Edi Rama ka mbledhur ditën e sotme të gjithë stafin e bashkisë së Durrësit me në krye Zhyljen Varfin në Qendrën e Emergjencave.
Gjatë takimit Rama ka udhëzuar kryebashkiaken e re për detyrat që duhet të kryejnë, nga ndihma e banorëve të prekur nga tërmeti deri tek inertet e qytetit.
“E para lista e investitorëve për të ndërtuar pallatet. Dhe gjëja e parë, ti që ke marrë detyrën të drejtosh bashkinë do i thërrasësh ti një nga një.
E dyta, është problemi i inerteve. Do ta pastrojmë ne para vitit të ri siç u pastrua Lana. Pra do depozitohen në Porto Romano. Do i heqim dhe do të bëjmë parkun. Tjetra dua hartën e tokës shtetërore që është në zonën e universitetit. Me të gjitha të dhënat. Nesër dua të gjitha këtu.
E fundit nesër në çdo pikë do të jenë dy persona që do të shpjegojnë gjithçka dhe pjesa e kaomodimit do të jenë vetëm ata që kanë realisht nevojë”, tha Rama.
Por përpara se Çuçi të fillonte fjalën e tij Rama ka ndërhyrë duke kërkuar që t’i fiknin televizorët që ishin përpara tij.
“M’i fikni pak ato televizorët se si shof dot me sy”-tha Edi Rama. Sigurisht TV u fikën dhe Çuçi vijoi me raportimin, që në fakt, shkon sërish tek informimi i qytetarëve.
“Atë punën e akomodimit të qytetarëve mund ta bëjmë vetëm me anë të atyre televizorëve që juve sapo i përmendët”-tha Çuçi, duke i treguar Ramës sa të domosdoshme janë mjetet e informimit për qytetarët në këtë moment kritik për ta.
