Kryeministri Edi Rama së bashku me ministren e arsimit Lindita Nikolla, mblodhi maturantët fitues nga sistemi i ri i pranimit në Universitet në një takim që po zhvillohet në kryeministri ndërkohë që pjesa tjetër e maturantëve që nuk kanë fituar në asnjë degë janë mbledhur jashtë duke protestuar.
Rama është shprehur se reforma ndonëse e vonuar, funksionon më së miri duke lënë në rradhë të parë më të mirët.
Rama: “Unë ftova të vinin këtu rreth 150 maturantë, më të mirët e vitit që sapo u mbyll. Jo ata që domosdoshmërisht kanë fituar, por më të mirët. Dhe çfarë mësova? Se nga më mirët që jeni ju këtu, jo vetëm që askush nuk ka mbetur jashtë, por në më të paktën ka fituar 4 degë.
Kjo është e vërteta kuptimplotë e faktit që kjo reformë shumë e vonuar për vite të tëra e domosdoshme, kurajoze, dhe shumë e vështirë për shkak të një sistemi, praktike dhe mendësie të ndërtuar se prapthi për vite të tëra, tani funksionon më së miri, në radhë të parë për më të mirët.
Secili prej jush mund të dëshmojë se reforma funksionon së pari sepse ka një transparencë të plotë, dhe se çdo maturant e ka sistemin para syrit. Së dyti, sepse është e bazuar në konkurrencën që diktohet nga rezultatet, dhe bën të pamundur interferimin e faktorëve të jashtëm të natyrave të ndryshme, që kanë qenë gangrena e sistemit tonë universitar.”
Në përgjigje të maturantëve që po protestonin jashtë dyerve të kryeministrisë Rama tha se ata duhet të kërkojnë çfarë meritojnë dhe jo të bërtasin në rrugë.
Rama:“E morën vesh që ju jeni këtu, vijnë bërtasin dhe nuk dinë për çfarë bërtasin, çfarë thonë, çfarë kërkojnë. Në vend që të shikojnë dhe të studiojnë të gjithë skemën dhe të marrin atë që mendojnë që meritojnë, rrinë në rrugë dhe bërtasin. Sikur të ishin vetëm këta do ta zgjidhnim por s’janë vetëm këta që bërtasin dhe këta janë më të pafajshmit sepse jua çorodisin mendjen të tjerët”.
Kryeministri është shprehur se nuk ka më të tillë histori ku një taksist të jetë me master apo doktoraturë.
Rama: “Unë kam një zakon të vjetër që në kohën kur isha kryetar bashkie. Një apo dy herë në vit dal natën i pashoqëruar dhe i iki edhe atyre të gardës që nuk e kuptojnë ku shkoj dhe marr një taksi. Kam shumë dëshirë të flas me njerëzit që janë shofer taksish sepse ata janë barometri më i mirë. Në një taksi mund të dëgjosh për dy orë gjithçka dhe mund të kuptosh shumë më tepër sesa nga analiza, analistët, debatet, portalet, online për vendin ku jeton dhe për problemet që kanë njerëzit. Shqyqyr që spo gjej më problemin që çdo taksixhi të jetë me master. Takoja taksixhi me master, me doktoratura dhe e tregonin, i merrnin në natyre, nuk shkonin në universitet. Njëri i shërbente gruas së pronarit të universitetit, i merrte i çonte fëmijët në shkollë dhe ai i jepte master, doktoratorë etj. Sot nuk ka më të tilla.”
