Kryeministri Edi Rama, i është përgjigjur kritikave të bizneseve të huaja për përkeqësimin e klimës së bizneseve në Shqipëri. Në fjalinë e tij në mbledhjen e këshillit ekonomik, Rama tha se ka kompani që tundin flamurin amerikan duke kërcënuar të mos paguajnë taksat në vendin tonë.
Rama tha se ajo çka qeveria ka bërë nuk është e mjaftueshme, por dhe bizneset nuk janë mësuar të respektojnë ligjet. Kreu i qeverisë u shpreh se vetëm në Shqipëri, kompanitë e huaja nuk pranojnë të paguajnë taksat duke kërcënuar se do të na diskretitojnë ndërkombëtarisht.
“I kam dëgjuar me vëmendje reagimet e biznesit apo disa dhomave të tregtisë që kanë nënvizuar një problematikë të konsiderueshme në klimën e të bërit biznes. Në këto reagime ka një të vërtetë të madhe që çka kemi bërë nuk mjafton nëse nuk vazhdojmë më tutje për ta kompletuar. Por ka edhe një të vërtetë tjetër që shumë pak janë mësuar bizneset të respektojnë ligjin. Që shumë pak janë mësuar sipërmarrjet të veprojnë në çdo hap dhe çdo detaj brenda kornizës së ligjit. Informaliteti nuk është vepër e disave por e të gjithëve së bashku. Vepër e qeverive që nuk e kanë reformuar sistemin e funksionimit të shtetit shqiptar, që nuk e kanë reformuar administratën, posaçërisht atë fiskale, që nuk e kanë reformuar drejtësinë por edhe vepër e aktorëve në treg që kanë përfituar një hapësirë ku rregullat kanë qenë në letër dhe ligjet kanë mbetur në letër. Vetëm në një vend si ky mund të ndodhë që një kompani e huaj thotë se ‘unë nuk kam mundësi të paguaj taksat dhe ju nuk më impononi dot sepse unë do t’ju diskretitoj ndërkombëtarisht’. Vetëm në këtë vend një kompani e huaj që valëvit flamurin amerikan apo një tjetër mund të kërcënojë qeverinë shqiptare, një qeveri sovrane”.- theksoi kryeministri.
Gjithashtu Rama u ka bërë thirrje bizneseve se për çdo problem që kanë me administratën dera e tij dhe e ministrit Ahmetaj është e hapur. Ai nuk pranon faktin se klima e biznesit në Shqipëri është përkeqësuar.
“Nuk është i vetmi shembull për fat të keq, pasi e kam bërë të qartë për të gjitha kompanitë. Për çdo problem që biznesi ka me administratën, dera ime është e hapur dhe e ministrit Ahmetaj. Atyre që bëjnë engjëllin, por në fakt janë në pozicionin e djallit, në raste të caktuara, pranojmë se ajo që kemi bërë është e papranueshme. Të më thoni mua se klima e biznesit sot është përkeqësuar, ndërkohë që 32 muaj më parë nuk merrnit dot një TVSH pa paguar 50 për qind të të paktën asaj që ju takonte, kjo më duket e tepruar. Të më thoni mua se klima e biznesit është përkeqësuar, pasi nuk guxonit të hapnit gojën dhe kishit shtruar km rrugë, dhe iu futët kredive, kjo është e vështirë. Juve ju trajtonin si shërbëtor të marrë peng, dhe jo sipërmarrës. Ndaj më duket e tepruar. Ajo që shoh të domosdoshme dhe jo të tepruar është kërkesa juaj dhe e imja, për qeverinë për të lehtësuar procedurat. Për të lehtësuar dhe thjeshtuar paketën fiskale, për të bërë një kuadër që të jetë i thjesht ne Rajon dhe Europë. Po punojmë intensivisht për një model të ri të trajtimit të ankesave të sipërmarrësve. Falenderoj Luan Bregasin, edhe pse do më akuzojnë për favorizim.”-përfundoi Rama.
