Felaj: Nuk është Presidenti i Republikës ai që ka tagerin për t’i hyrë vlerësimit të kandidaturës së një ministri që propozohet nga Kryeministri
“Në se presidenti nuk e ushtron kopetencën formale për dekretimin e ministrave të rinj atëherë mund të shkarkohet”. Kjo është deklarata e ministres për marrëdhëniet e qeverisë me Kuvendin, Ermonela Felaj. Ajo tha për Top-Channel, se kushtetuta e detyron presidentin të dekretojë ndryshmet në qeveri. “Kushtetuta urdhëron Presidentin që të veprojë në momentin që ka një propozim nga Kryeministri dhe këtë duhet të bëjë Presidenti. Kompetenca e Presidentit për të emëruar apo shkarkuar ministra, është thjeshtë një kompetencë e aspektit honorifik ose simbolik. Nuk është Presidenti i Republikës ai që ka tagerin për t’i hyrë vlerësimit të kandidaturës së një ministri që propozohet nga Kryeministri. Nëse ka vendosur, në fakt siç e ka shprehur në disa sjellje për fat të keq, që të sillet në institucionin e Presidentit të Republikës së Shqipërisë si militanti më i rëndomtë nga partia e cila vjen, atëherë natyrisht që do të marrë atë përgjigjie që merr kushdo që guxon të sfidojë, jo Kushtetutën, por guxon të sfidojë sovranin. Natyrisht nuk ngurroj fare ta them që kjo të çon në shkarkim nga detyra”, deklaron Felaj.
Presidenti Bujar Nishani, dekretoi dy ditë më parë, shkarkimin e Shkëlqim Canit nga detyra e Ministrit të Financave dhe shkarkimin e Arben Ahmetajt nga detyra e ministrit të Ekonomisë. Por Nishani nuk ka dekretuar ende, emërimin e Arben Ahmetajt në detyrëne ministrit të Financave dhe atë të Milva Ekonomit në ministrinë e Ekonomisë.
