Edhe pse na ndajnë një orë nga protesta e opozitës, foltorja e selisë së Partisë Demokratike është kthyer në një vendthirrje nga qytetarë të ndryshëm që t’i bashkohen protestës. Kësaj radhe ka qenë një qytetare nga qyteti i Elbasanit, profesioniste e lirë e cila është shprehur se do të marrë pjesë në protestën që do të organizohet në orën 19:00 përpara kryeministrisë. Jona Koprencka shprehet se vjen nga një familje të përndjekurish politik dhe sipas saj, historia duket sikur përsëritet. Ajo gjithashtu shprehet se do të protestojë për një jetë më të mirë.
“Jam Jona Koprencka, profesioniste e lirë, nga Elbasani. Do të marr pjesë në protestën e 7 korrikut, sepse nuk dua t’i bashkohem Armatës gri të atyre që braktisin Shqipërinë. E mendoj edhe unë ikjen nga Shqipëria. Sepse jetoj me partnerin dhe gjithë rroga ime ikën vetëm për ushqime. Unë i bëj vetë pazaret dhe e shoh se si, shpenzimet e produkteve të shportës rriten nga dita në ditë. Karburanti merr gjysmën e rrogës, dhe nuk po flas për rrogë buxhetore, por për rroga profesionistësh. Më 7 korrik nuk protestoj vetëm për një jetë më të mirë. Protestoj edhe për një jetë më dinjitoze. Më frikëson dhe më zemëron vjedhja e të dhënave personale. Fakti se bisedat e mia, rroga, të dhënat, çdo gjë private, një patronazhist mund t’i bëjë publike dhe të lavdërohet po publikisht nga kryetari i qeverisë. Unë vij nga një familje të përndjekurish poiltikëdhe kujtoj historitë që tregoheshin nga të afërmit e mi që jetuan komunizmin. Se si ruheshin, flisnin nën zë, nga frika se mos i përgjonin. Duket se historia po përsëritet dhe unë nuk dua të ruhem edhe sot, si dikur gjyshërit e mi në diktaturë. Në fund, dal në protestë më 7 korrik edhe për vlerën e lirisë. Liria për të protestuar dhe për ta mposhtur fjalinë fatale ‘pse të dal, se këtu asgjë nuk ndryshon?!’. Kur të na kenë bindur se ‘asgjë nuk ndryshon’, Shqipëria është në rrezik!” – u shpreh Jona Koprencka.
